Сочидин модадин бизнесдин ва праводин институтдин ректор яз кIвалахзавай Мугъулов Физули вичин хайи Хъуьлуьдрин хуьруьз мугьман хьанва.Физули Къурбанович Рутул райондин Хъуьлуьдрин хуьре юрист Къурбананни духтур Зариятан хизанда 1962-йисуз дидедиз хьана.
Ам зирек, зигьинлу аял яз чIехи хьана. Хуьруьн юкьван школа къизилдин медалдалди куьтягьна, Москвадин М.В. Ломоносован тIварунихъ галай университетдин философиядин факультетдик экечIна. 1985-йисуз Физулиди вуз агалкьунралди куьтягьна ва ана студентриз тарсарни гуз, аспирантурада кIелни ийизвай. Базардин экономикадин шартIариз талукь темадай философиядин илимрин диссертация вахтундилай вилик хвейи адакай илимрин кандидат хьана. 2004-йисуз МГУ-да Физулиди социологиядин илимрин докторвилин дережани хвена. Профессор Физули Мугъулов илимдин пудкъадалай виниз кIвалахрин автор я. Абурун арада монографияр, кIелунинни методикадин кIвалахар ава. 2008-йисуз РагъакIидай патан Кавказдин илимдинни образованидин рекьяй тухвай кIвалахдай адаз “Национальная слава” медаль гана.
2009-йисуз ам Австриядин Вена шегьердин университетдин Гьуьрметлу профессорвиле хкяна. Физули муаллим Европадин ректоррин Советдин членни я.
Ада Сочида МБиП институт ачухай 1997-йисалай инихъ анин ректор яз кIвалахзава. Эхиримжи цIуд йисан вахтунда институтди международный, Вирироссиядин регионально-научный ва научно-практический цIудралди конференцияр, конкурсар, вуздиз талукь маса серенжемар кьиле тухвана. Институтди маса уьлквейрин вузрихъ галазни алакъаяр хуьзва.
Сочида госуниверситетдани кIвалахзавай Физули Мугъулов РФ-дин высший образованидин гьуьрметлу работник, Нью-Йоркдин илимрин академиядин академик, Россиядин тIебии илимрин академиядин член-корреспондент я. ВикIегь хцихъ чаз мадни еке агалкьунар хьана кIанзава.
Саид-Агьмед Абдурашидов
