Мегьарамдхуьруьн районда культура, искусство ва халкьдин художественный яратмишунар вилик тухунин муниципальный программадин сергьятра аваз кьиле тухузвай кIвалахдиз талукь совещание хьана.
Веревирдер авунин и мярекатда районда культурадин хилен жавабдар къуллугъчийри, идарайрин регьберри, общественный тешкилатрин ва къанун-къайда хуьдай органрин векилри иштиракна. Совещание райондин кьилин 1-заместитель, райондин кьилин везифаяр вахтуналди тамамарзавай Гьабибуллагь Мурадалиева тухвана.
КIватI хьанвайбурун фикир желбдай кар алай доклад райондин культурадин отделдин директор Эседуллагь Селимова авуна.
Ада вичин рахунар 2017-2019-йисар патал муниципальный и программадикай умуми суьгьбетунилай башламишна.
Э.Селимова къейдайвал, культурадин хиле кIвалахзавайбурун мажибар хкажунин ва оптимизациядин макьсаддалди районда 21 хуьруьн культурадин центраяр ва са клуб “Посёлокрин уртах культурадин центр” МБУК -диз элкъуьрнава ва виликан вири къуллугъчияр аниз кьабул хъувунва.
Докладчикдин гафарай, халкьдин меденият ва адетар хуьн патал райондин идарайра клубдин 170 тешкилат кардик ква, анриз 1975 кас желбнава, абурукай 92 аялар патал я.
Искусстводин хиле яратмишдай ва чирвилер гудай тежрибалу пешекарар гьазурун патал Тагьирхуьруьн-Къазмайрин аялрин искусстводин школа арадал гъанва. Мегьарамдхуьруьн райондин тарихдинни край чирдай музей кардик ква.
Кьиле тухванвай кIвалахрикай — мярекатрикай рахадайла, Эседуллагь Селимова райондин коллективрин агалкьунарни къейдна.
Адан гафарай, симинин пагьливанрин “Гьунар” коллектив неинки районда ва республикада, гьакI вири уьлкведа вичихъ игьтияж авайди хьанва. Виликамаз теклифай райондин и коллективди Астрахандин областдин ва Самара шегьердин мярекатра иштиракна. “Гьунардихъ” галаз санал райондин яратмишунрин маса коллективри ва гьевескар артистри Буйнакскда, Усугъчайдал, Кьурагьа, Каспийскда, Махачкъалада ва масанра кьиле фейи республикадин фестивалрани суваррин межлисра иштиракна.
Э.Селимова “Гьунар” коллективдиз куьмекар гунай райондин кьил Фарид Агьмедоваз сагърай лагьана.
Культурадин отделдин директорди районда халкьдин музалатрин ансамбль, зуьрнечийрин оркестр, чIагъанчийрин ансамбль, хизанрин ансамблар, гьакIни “Мечта” ва “Аран” ВИА-яр авайдакайни лагьана, ам кьилди абурун яратмишунрин рекьерални акъвазна, кIвалах мадни активламишун герек тирди къейдна. Бут-Къазмайрал ва Хважа — Къазмайрал фольклордин “Билбилдин сесер” ва “Хважа” дестеяр кардик ква.
Библиотекадин къурулушда авай агалкьунрикай рахайдалай кьулухъ Эседуллагь Селимов гьялун герек тир месэлайрални кьилди-кьилди акъвазна.
— Культурадин хиле месэлаярни авачиз туш. Культурадин бязи идараяр авай дараматар капитальнидаказ ремонт авун герек я. Библиотекайрин ктабрин фонд цIийи хъувуна кIанзава. Чкайрал бязи хуьрерин кьилер къуллугъчияр тайинарунин кардив мукьуфдивди эгечIзавач. Культурадин центрадин филиалрин материалринни техникадин база хуьн ва хъсанарун патал хуьрерин бюджетрай такьатар тIимил ахъайзава.
Агалкьунрихъ ва вилик эцигай месэлайрихъ яб акалайдалай кьулухъ Гьабибуллагь Мурадалиева муниципальный программадин сергьятра аваз кIвалах активламишун патал талукь идарайрин регьберриз тапшуругъар гана.
«Лезги газет»
