Чна газетдин вилик квай са нумрада хабар гайивал, кикбоксингдин “фул-контакт” разделдай Дагъустандин кIвенкIвечивал патал кьиле фейи чемпионатда Белиждин 2-нумрадин ДЮСШ-дин ученик Амин Залова, финалдин акъажунра вичихъ галаз бягьсиниз экъечIайди нокдаундиз ракъуруналди, СКФО-дин чемпионатда иштиракдай путевка къазанмишнай…
Алатай вацра кикбоксингдин “Лайт-контакт” ва “Поинтфайтинг” жуьрейрай СКФО-дин кIвенкIвечивал патал Избербаш шегьерда кьиле фейи акъажунра Амин Залова вичихъ галаз бягьсериз (кьве жуьредайни) экъечIайбурал инанмишвилелди гъалибвал къазанмишна. Ам къизилдин кьве медалдизни кьве кубокдиз лайихлу хьана. Спортдин рекье устадвал къалурунай ам кикбоксингдай спортдин мастервилин дережадиз лайихлу хьана. Им неинки са Аминан, гьакI адаз спортдин вердишвилер гузвай тренер, Дагъустан Республикадин физкультурадин рекьяй лайихлу къуллугъчи Шагьмурад Залован чIехи агалкьунни я.
Гила Аминани тренерди Россиядин кIвенкIвечивал патал акъажунриз гьазурвилер аквазва. Къуй анайни чав шад хабарар агакьрай!
Къагьриман Ибрагьимов
