Са шумуд югъ идалай вилик Дербент шегьердин культурадин, спортдин, жегьилрин сиясатдин рекьяй управлениди ва шегьердин ГТО-дин тестар тухузвай муниципальный центради стадиондал шегьердин школайра, колледжра, институтра кIелзавайбурун арада Вирироссиядин физкультурадинни спортдин хъуьтIуьн “Готов к труду и обороне” фестиваль кьиле тухвана. Ана 250 касди чпин устадвал къалурна.
Фестивалда шегьердин кьилин заместитель Видади Зейналова, азаддаказ кьуршахар кьунай дуьньядин ва Европадин чемпион Къурамегьамед Къурамегьамедова, спортдин рекьяй шегьердин кьилин меслятчи Тамерлан Сардарова, ГТО-дин тестар тухузвай муниципальный центрадин директор Назим Къурбанова ва масабуру иштиракна.
Фестивалдин мярекат ачухдайла, кIватI хьанвайбурухъ элкъвена рахай В.Зейналова гьар са иштиракчидихъ агалкьунар ва мягькем сагъламвал хьун алхишна. Дагъустан Республикада ГТО-дин комплексдин векил Къурамегьамед Къурамегьамедова Дербентда физкультурадал ва спортдал машгъул жедай вири шартIар авайдакай лагьана.
Гуьгъуьнлай ГТО-дин нормативрик квай са шумуд жуьредай — 100, 2000, 3000 метрдиз чукурунай, спортдин снаряд гадарунай, турникдал чене акъудунай, чкадилай хкадарунай ва маса акъажунар кьиле фена.
Нормативар хъсандиз ацIурай иштиракчийриз ГТО-дин талукь дережадин знакар гана. Акъажунрин нетижайриз килигна, ГТО-дай республикада кьиле фидай паюна иштиракдай шегьердин команда арадал гъана.
«Лезги газет»
