27-августдиз Дагъустандин Гьукуматдин Председателдин заместитель Мурад Къазиеван регьбервилик кваз, 1999-йисан августдинни сентябрдин варцара республикадин мулкарал терроризмдиз акси серенжемар кьиле тухудайла, тешкилай самооборонадин отрядрик кваз дяведин женгера иштиракай ксарикай ибарат сиягь туьхкIуьр хъувуниз, аник алава ксар кухтун хъувуниз талукьарнавай Республикадин комиссиядин 4-заседание кьиле фена. Идакай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
Мурад Къазиева рикIел хкайвал, 1999-йисуз международный террористрин кьушунар терг авун неинки са Дагъустандин, гьакIни вири Россиядин алай аямдин тарихдани важиблу вакъиа я. Адан гафаралди, алатнавай йисари и вакъиадин важиблувал ва чIехивал мадни виле акьадайди авунва.
“И вири крари халкьдин ополченидин членриз дяведин женгерин ветеран тIвар гунин кIвалах хъсандиз тешкилун кьетIендаказ истемишзава. Гьаниз килигна и кардал кIукI гъун ва Дагъустандин халкьдин итижар дуьз тегьерда къалурун патал герек вири серенжемар кьабулун лазим я.
И карда чи вилик акъвазнавай кьилин месэла чпин иштираквили чаз тайин дережада куьмекдай инсанар, халкьдин ополченидин отрядрин иштиракчияр аваз хьуникай ибарат я. ИкI чавай ахьтин ксарив государстводин, яшайишдин рекьяй закондалди тайинарнавай куьмек агакьариз жеда”,- къейдна Къазиева.
“Халкьдин ополчение 1999 “Интербригада” Дагъустандин региондин общественный организациядин председатель Муталим Муталимова 1999-йисан халкьдин ополченидин отрядри властдин органрихъ галаз кIвалах тешкилунин кьилин хилерикай суьгьбетна.
Совещанидал мадни къейд авурвал, Дагъустандин ополченцийриз дяведин женгерин ветеран тIвар гунин месэла гьялун ва сиягьар дуьм-дуьз туьхкIуьрун патал республикадин ва муниципальный дережайра махсус комиссияр арадал гъанва. Анрик муниципалитетрин кьилер, военный комиссариатдин ва ОВД-дин къуллугъчияр, самооборонадин отрядрин командирар, женгерин иштиракчияр, общественный тешкилатрин векилар ква.
РикIел хкин: республикадин комиссияди кIвалах башламишайдалай кьулухъ 3 заседание кьиле тухвана, 512 дагъустанви ополченцияр женгерин ветеранар яз гьисабнава. РФ-дин РД-да авай Пенсийрин фондунин отделенидин малуматдалди, вацра 3 212, 04 манат гузвайбурук дагъустанви ополченцийрикай “дяведин женгерин ветеран” категориядик акатнавай 434 кас ава.
Гуьгъуьнлай заседанидин иштиракчияр 19 ополченецдин материалрихъ галаз таниш хьана, абурукай 17 Комиссиядин къарардалди, дяведин женгерин иштиракчияр тирди тайинарнава, РД-дин Гьукуматди гуьгъуьнлай къарар тестикьардалди, абур ополченцийрин сиягьдик кухтунва. Кьве касдин материалрай алава ахтармишунар кьиле тухун лазим атана.
Заседанидин кIвалахда РД-дин Минтруддин, МВД-дин, военный комиссариатдин, Дагъустандин Общественный палатадин, республикадин муниципалитетрин, общественный тешкилатрин векилри иштиракна.
«Лезги газет»
