Махачкъала шегьердин Советский райондин судди Дагъустандин туризмдин ва халкьдин яратмишунрин сеняткарвилерин виликан министр Расул Ибрагьимов 26-ноябрдалди дустагъда тадай къарар акъудна. Идакай ТАСС-диз РД-дин Верховный суддин пресс-къуллугъдин кьил Зарема Мамаевади хабар гана.
Ада къейд авурвал, силисдин органри суддиз Расул Ибрагьимов мад 3 вацра дустагъда тунин гьакъиндай теклиф рекье туна. Нетижада судди силисдин тереф хвена.
РикIел хкин, Р.Ибрагьимов 9-апрелдиз къанун-къайда хуьдай органрин векилри кьунай. Силисдин фикирдалди, ада са шумуд касдикай ибарат тахсиркарвилин десте арадал гъана ва 2017-2018-йисара республикадин бюджетдай 620 млн манатдин кьадарда аваз пул чуьнуьхна.
Къейдзавайвал, мемекьуьртIнавай пулдин такьатар агьалийриз яшайишдин рекьяй жуьреба-жуьре къуллугъар авуниз чара авунвайбур тир.
«Лезги газет»
