Гьуьрметлу газет кIелзавайбур!
Пайгъамбардин (Аллагьдин салават ва салам хьуй вичиз) гьадисра лагьанвайвал, берекатрив ацIанвай рамазандин варзни акваз-такваз акъатна. И вацра дуьньядин жуьреба-жуьре уьлквейра яшамиш жезвай миллионралди мусурманри Аллагь паталди сивер хвена.
Рамазандин варз чи республикадин агьалийрини шадвилелди къаршиламишна, адан сергьятра аваз мергьяматлувилин мярекатар, ифтарар тешкилна. Мисал яз, фикирдиз 8-апрелдиз Махачкъалада, Иса пайгъамбардин тIварунихъ галай руьгьдин центрада, кьиле фейи лезги халкьдин ифтар къвезва. Аниз 18 агъзурдав агакьна инсанар атанвай. 16-апрелдиз Дербент шегьерда тешкилай ифтарди лагьайтIа, 35 агъзурдав агакьна дагъустанвияр санал кIватIна.
Сив хуьнин сувар мубарак авуналди, чаз квехъ чандин сагъвал, яргъи уьмуьр, хушбахтвал хьана кIанзава. Къуй и вацра куьне хвейи сивер, гайи садакьаяр, авур вири ибадатар Аллагьди кьабулрай.
«Лезги газет»
