12-апрелдиз Махачкъалада, имам аш-Шафиидин тIварунихъ галай мискIинда, Алкьвадар Гьасанан тIварунихъ галай медениятдинни марифатдин центради тешкилнавай ифтар кьиле фена.
Ана лезги халкьдин жемиятдин, сиясатдин, медениятдин векилри, алимри, динэгьлийри, спортсменри, меценатри иштиракна. Кьилди къачуртIа, абурун арада РД-дин Общественный палатадин комитетдин председатель Ислам Мегьамедов, “Лезги газетдин” кьилин редактор Мегьамед Ибрагьимов, диндин алим Ямин Мегьамедов, имам аш-Шафиидин тIварунихъ галай мискIиндин имам Жейгьун Агьмедов ва масабур авай.
Къейд ийин хьи, тIвар кьунвай мискIин халкьдин арада лезги мискIин хьиз машгьур я, гьикI лагьайтIа, ам эцигунин кардик асул пай кутурбур чи халкьдин векилар я.
Рамазандин вацран гьар юкъуз ина лезги меценатрин такьатрихъ ифтарар тешкилна ва анра вишералди мусурманри сивер хкудна.
Къуй жумарт рухвайри Аллагьдин рекье авунвай садакьаяр Аллагьди кьабулрай!
«Лезги газет»
