Гатун кьвед лагьай варз Дагъустанда мукьвара кьиле фейи вакъиайрикди чимиди, зегьемди хьана. 4-июлдиз Дагъустандин Гьукуматдин Председателдин Сад лагьай заместитель Рамазан Алиеван кIвалахдин кабинетда, кIвале къанун-къайда хуьдай органрин векилар къекъвена. Гьа и юкъуз РД-дин Кьилин везифаяр вахтуналди тамамарзавай Владимир Васильева вичин указдалди Р.Алиев къуллугъдикай азадна. Малум хьайивал, чиновникди къуллугъдин векилвилер артухарунай адалай уголовный дело къарагъарна.
Са тIимил вахт арадай фейила, Р.Алиеван кIвалахдин кабинетда къанун-къайда хуьдай органрин векилар къекъвейди Махачкъалада кьиле фейи совещанидал республикадин Кьилини тестикьарна. Идакай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана. “Къе адан кабинетда къекъвезва. Гьавиляй ам къуллугъдикай азаддай захъ вири бинеяр ава”, — лагьанай В.Васильева совещанидин вахтунда.
Адан гафарай малум хьайивал, мукьвара республикадин Хатасузвилин советдин заседание тухванай. Анал Дагъустандин са жерге районрин агьалияр целди таъминарунин месэлайриз 400 миллион манат пул чара авунвайдакай хабар ганай.
“И кIвалах за вич къе къуллугъдикай азаднавай Гьукуматдин Председателдин Сад лагьай заместителдал тапшурмишнавай. Ада заз ва Гьукуматдин Председателдиз, алай йисан сад лагьай кварталдин нетижайрал асаслу яз, 1 миллиардни 30 миллион манат налогар кIватIнавайди малумарна. Гуьгъуьнлай тайин хьайивал, а кьадар пул кIватIнавачир, арадал атанвайди 300 миллиондилай са тIимил артух пул тир…”, — къейдна В.Васильева.
4-июлдин нисинилай кьулухъ региондин ва федеральный СМИ-ри уголовный делодин сергьятра аваз Р.Алиев кьунвайдакай хабар гана.
6-июлдиз Махачкъаладин Советский райондин судди Дагъустандин виликан сад лагьай вице-премьер 10 йикъан вахтунда дустагъна. РД-дин Верховный суддин пресс-къуллугъдин регьбер Зарема Мамаевади къейд авурвал, цIуд йикъан къене Р.Алиевак кутазвай тахсир раижда.
Информациядин ТАСС агентстводи, къанун-къайда хуьдай органра авай вичин чешмедал асаслу яз, хабар гайивал, судди “Автохозяйство” ГКУ-дин (Дагъустандин Гьукуматдин гараж) виликан регьбер Асхабали Абдулатиповни дустагъна. Адакни, Рамазан Алиевак хьиз, къуллугъдин векилвилер артухарунай тахсир кутуна. Къейд ийин хьи, абур кьведни уголовный делодин гьа са месэладай иштиракчияр я.
Са жерге СМИ-ра Асхабали Абдулатипов РД-дин виликан Кьил Рамазан Абдулатипован мукьва-кьили я лугьудай хабар чукIурна. Амма Рамазан Гьажимурадовича ТАСС-диз вичин ва Асхабали Абдулатипован арада мукьвавилин алакъаяр авачирди тестикьарна.
Чи мухбир
