Р.Алиев дустагъ авур пакадин юкъуз — 7-июлдиз къанун-къайда хуьдай органрин къуллугъчийри мад са чиновник кьуна — РД-дин здравоохраненидин виликан министр Танка Ибрагьимов. Адак медицинадин алатар къачун патал бюджетдай чара авунвай пулдин такьатар чуьнуьхунай ва къуллугъдин рекьяй векилвилер артухарунай тахсир кутуна.
Алатай гьафтедин гьяд юкъуз Махачкъаладин Кировский райондин судди Т.Ибрагьимоваз 10 юкъуз кIвалин шартIара дустагъдай къарар акъудна. Къарардал асаслу яз, адан гьакъиндай официальный тахсиркарвал раиж авурдалай кьулухъ ам дустагъ авун кьве вацралди давамардайвал тир.
Амма… Газет чапдиз вахкузвай юкъуз редакциядиз РД-дин МВД-дин пресс-къуллугъди хабар гайивал, 9-июлдин йифиз Т.Ибрагьимов нубатдин сеферда кьуна. РД-дин МВД-дин экономикадин хатасузвилин ва коррупциядиз акси Управленидин къуллугъчийри медицинадин препаратар маса къачун патал электронный аукционар кьиле тухудайла, республикадин здравоохраненидин виликан министрди ва ведомстводин са жерге маса къуллугъчийри лутувилиз рехъ ганвайди винел акъудна.
ЦIийиз пайда хьайи делилрин бинедаллаз, РД-дин МВД-дин СУ-дин къуллугъчийри Танка Ибрагьимован гьакъиндай мад са уголовный дело къарагъарна. Кьилди къачуртIа, адак, адан виликан са заместителдик ва ведомстводин госзакупкайрин отделдин пешекаррик тахсиркаррин десте арадал гъунай тахсир кутунва. Республикадин къанун-къайда хуьдай органрин делилралди, и дестеди, медицинадин алатар маса къачудайла, абурун къиметар хкажуналди, региондин ва федеральный бюджетрай чара авунвай 44 миллион манат ва РД-дин медидарайрин игьтияжар патал медикаментар агакьардайла 71 миллион манат пул чуьнуьхна.
56 йис хьанвай Танка Ибрагьимов РД-дин здравоохраненидин министрвиле 2013-йисан февралдиз тайинарнай. Медицинадин илимрин доктор, профессор, РФ-дин лайихлу духтур Т.Ибрагьимова 2018-йисалай вахтуналди РД-дин здравоохраненидин министрдин везифаяр тамамарзавай. Алай йисан апрелдин вацра ам, арза кхьена, отставкадиз экъечIна.
Чи мухбир
