“Сбербанк страхование” компаниядини интернетда авай Туту.ру сервисди 2020-йисан 1-майдилай 15-июндалди маса гайи авиабилетар фикирда кьуна кьиле тухвай ахтармишунрин бинедаллаз, россиявияр алукьнавай гатуз сиягьат ийидай фикирдилай элячIнавач, амма, чIехи пай агьалийри и кар уьлкведин къенепата ийида. Махачкъалади ял ягъун патал хкянавай виридалайни машгьур рекьерин арада 9-чка кьунва.
Хаталу азар чукIунихъ галаз алакъалу яз Россиядин агьалийри авиасиягьатриз билетар виликамаз саки къачузмачир.
Алай гатуз виридалайни рикI алаз хкязавай чкаяр, алатай йисуз хьиз, Симферополь (маса ганвай билетрин 9,6%), Сочи (3,3%) ва Анапа (3,1%) я. 4 лагьай цIарцIиз сифте сеферда яз Минеральный Ятар (2,7%) хкаж хьанва, йис идалай вилик и шегьер 8-чкадал алайди тир. Сифтегьан цIуд шегьердин арада гьакIни Краснодар, Калининград, Санкт-Петербург, Уфа, Махачкъала ва Геленджик ава.
Россиявийри, лагьана кIанда, гьакI къецепатан уьлквейризни, месела Туьркиядиз, Германиядиз ва Чехиядиз итиж ийизва, амма анриз асул гьисабдай гатун эхирдай фин пландик кутунва. Къецепатан уьлквейриз тир авиабилетрин кьадар гьеле 5 процентдилай тIимил яз ама. Ял ягъун патал россиявийри асул гьисабдай хкязавай 10 шегьердиз самолетра аваз финиз билетрин юкьван гьакъи, алатай йисан и вахтунив гекъигайла, 17 процентдин агъуз хьанва: 8696 манатдилай 7232 манатдал кьван. Кьве патахъни, яни фин ва хтун патал виликамаз къачузвай билетрин къиметар 25 процентдин агъуз хьанва: 15 7123 манатдилай 11 817 манатдал кьван.
«Лезги газет»
