Саудовский Аравиядин гьукумдин кьилевайбуру коронавирусдин тIугъвал­дихъ галаз алакъалу яз алай йисуз анжах пачагьлугъда авай мусурманриз гьаж ийидай ихтиярар гуда. Ихтилат чкадин ва алай вахтунда пачагьлугъда­ авай къецепатан уьлквейрин агьалийрикай физва.

Саудовский Аравиядин гьаждин ва умрадин крарин рекьяй кардик квай министерстводин пресс-къуллугъди хабар гузвайвал, ихьтин къарар уьлкведа тIе­гъуьн чукIунин хаталувал авайди фикирда кьуна кьабулнава. Мадни, пачагьлугъда авай вири мусурманривай гьаж ийиз жедач, анжах тайин тир кьадардиз ихьтин бахт кьисмет жеда.

“Марва-Тур” компаниядин генеральный директор Булат Къурбанован гафаралди, алай вахтунда Саудовский Аравияда дагъустанвийрикайни ава. Асул гьисабдай, абур студентар ва карчияр я. Абурун кьадар гьикьван ятIа, компаниядиз малум туш.

Булат Къурбанова хабар гайивал, алай йисуз гьаж авун патал компаниядиз саки 3 агъзурдав агакьна дагъустанвийри пул ганвай. Абурувай пул элкъве­на вахчуз ва я тахьайтIа, къведай йисуз фин патал таз жеда.

Къейд ийин хьи, алай йисуз мусурманрин календардал асаслу яз, гьаж ийидай вахт июлдин эхиррал — августдиз эвел кьилерал ацалтзава.

Чи мухбир