28-майдиз райондин активдин нубатдин совещание Ахцегь муниципалитетдин кьил Осман Абдулкеримован регьбервилик кваз кьиле фена. Сифте гаф ада райадминистрациядин экономикадин отделдин начальник Азади Моллалиеваз гана.
— Налогар кIватIунин 5 вацран тапшуругъар районда эменнидай 96 ва чилин налогдай 120 процентдин кьилиз акъуднава. Капитальный эцигунарни чилин участокар актуализироватунин планар, талукь тирвал, — 69 ва 43 процентдин. Хъендик кваз кIвалахзавай вишелай артух ксар дуьздал акьулдуналди, йисан план 51 процентдин тамамарнава, — лагьана ада.
Райадминистрациядин кьилин заместитель Алмас Шуаева 29-июндиз кьиле тухузвай “Шарвили” эпосдин сувариз гьазурвилер акунин месэладал фикир желбна:
— Мумкин тир нукьсанриз рехъ тагун патал чна, алатай йисарин суварар кьиле фейи гьал веревирдна, серенжемар кьабулзава. Алай вахтунда теклифдин чарар, пропускар гьазурнава. Суварин мярекатар гегьеншдиз раиж авунин мураддалди республикадин журналистриз теклифнава. Райондин идарайрин руководителрини вуч авун лазим ятIа, тайинарнава. Райцентрада сангигиенадин гьалар хъсанарун кьетIен дикъетдик ква. 28-июндиз Ленинан, Байрамован ва Алискерован тIварарихъ галай куьчеяр, В.Эмирован, Х.ТIагьиран ял ядай паркар, КIелез хивен ротонда ва суварин вири майданар михьна, лозунгралдини банерралди безетмишна бегьемарун, мугьманар кьабулиз гьазур хьун лазим я.
Гьа и юкъуз Ахцегьа республикадин “Шалбуз дагъдин авазар” тIвар алай фестивални кьиле тухуда. Шадвилера райцентрадин агьалийри активнидаказ иштиракун ва, меслят хьанвайвал, СП-рин кьилерин гуьзчивилик кваз гьар са хуьруьн чIехи делегацияр атун важиблу я. Иллаки кьетIен фикир, общественный хатасузвал таъминарунин ва мугьманар хъсандиз къаршиламишунин месэлайриз гузва,- къейдна Алмас Исмаиловича.
Совещанидал райондин кьил Осман Магьмудовича муштулухдин хабарарни гана: райондин 5 школа (Ахцегьрин 2 ва 3-нумрайрин, гьакI Смугъулрин, КьакIарин ва Калукрин СОШ-яр) республикадин “150 школа” конкурсдин программадик акатнава; 2019-йисуз райцентрада ял ядай зурба парк (сметадин къимет — 17 млн. манат) туькIуьрунив эгечIда.
Совещанидал гьакI райадминистрациядин умуми отделдин начальник Расим Османов, эцигунрин сад тир заказчикдин управленидин начальник Мусаба Гьажиев ва маса юлдашар рахана.
Эхирдай Осман Магьмудовича, алатай совещанидал гайи тапшуругъар кьиле тухун ахтармишуналди, СП-рин кьилеризни бязи идарайрин руководителриз са жерге тапшуругъар гана.
Дашдемир Шерифалиев
