25-майдиз Москвадин миллетрин кIвале Азербайжан Республикадай тир лезгийрин машгьур шаир ва публицист Эйваз Гуьлалиеван (Эйваз Гуьлалийрин) яратмишунрихъ галаз алакъалу мярекат кьиле фена. И серенжем Лезгийрин федеральный милли культурадин автономияди ва лезгийрин медениятдин “Алам” журналди тешкилайди я.
Россиядин меркезда яшамиш жезвай лезги халкьдин векилрин культурадин уьмуьрда лишанлуди тир и вакъиа Э.Гуьлалиеван 50 йисан юбилейдин вилик кьиле фена. Шаирдин юбилей гатуз къейдда.
И серенжем ФЛНКА-ди “Москвадин миллетрин кIвале лезгийрин йикъар” лишандик кваз кьиле тухузвай гуьруьшрин арада пуд лагьайди я. РикIел хкин, идалай вилик ина ФЛНКА-дин Советдин вилик-кьилик квай ксар ва членар Москвада яшамиш жезвай лезги хизандик акатзавай халкьарин векилар тир жегьилрихъ галаз гуьруьшмиш хьана; Дагъустандин халкьдин шаир СтIал Сулейманан 150 йисан юбилейдиз бахшнавай литературадин мярекат кьиле фенай.
Москвадин миллетрин кIвалин чIехи зал инсанрив сиве-сивди ацIанвай. Ида Россиядин меркезда яшамиш жезвай лезгийрин арада Эйваз Гуьлалиеван яратмишунриз майилвалзавайбурун багъри халкьдин поэзиядал рикI алайбурун сан екеди тирдан гьакъиндай шагьидвалзава.
ФЛНКА-дин регьбер Ариф Керимова виликан Советрин Союздин мулкарал яшамиш жезвай Россиядин ватандашрихъ галаз тухузвай кIвалах, гьа гьисабдай Россиядин Президентдин патав гвай миллетрин алакъайрин рекьяй советдин заседанидин сергьятра аваз тухузвай кIвалах мадни гужлу авун чарасуз тирди къейдна.
Шаир Эйваз Гуьлалиевахъ галаз санал Бакудай Москвадиз адан дустар, “Алам” журналда ва литературадин “Марвар” кружокда адахъ галаз санал кIвалахзавай юлдашар атанвай. Абуру и мярекатда активдаказ иштиракна.
Лишанлу межлис лезгийрин медениятдин “Алам” журналдин кьилин редактор Камран Къурбаналиева тухвана. Къейд авун лазим я хьи, мярекат тамамвилелди лезги чIалал кьиле фена. Москвада ихьтин жуьредин серенжемар тамамвилелди лезги чIалал кьериз-цIаруз кьиле физвайди я.
Лезгийрин Федеральный милли культурадин автономиядин исполкомдин председатель Гьуьсен Шагьпазова ФЛНКА-дин Советдин тIварунихъай мугьманар тебрикна ва Эйваз Гуьлалиеваз юбилей мубаракна.
Москвада яшамиш жезвай лезгийрин манидар ва композитор Тарлан Шейдаева Эйваз Гуьлалиеван чIалариз теснифнавай манияр гитарадихъ галаз устадвилелди тамамаруналди мугьманрин гуьгьуьлар ачухарна.
Россиядин меркезда яшамиш жезвай жегьил шаир Эльмар Саруханова Эйваз Гуьлалиеван яратмишунри вичиз еке таъсир авурдан, вични шиирар кхьинал, руьгьламишайдан гьакъиндай лагьана.
Баку шегьердай тир журналист, общественный деятель, лезги чIалал передачаяр тухузвайди ва а передачайрин редактор тир Руслан Шейдаева Эйваз Гуьлалиеван яратмишунрихъ чи халкьдин культурадин уьмуьрда важиблу метлеб авайди къейдна.
ФЛНКА-дин жегьилрин департаментдин активист Шарвили Къурбаналиева Эйваз Гуьлалиеван ватанпересвилин руьгь квай “Зи тIем” шиир фасагьатдаказ кIелна. Шаирди ина дидед чIалал къимет эциг тийизвай ва ам рикIелай ракъурзавай ксарни авайдакай рикIе тIал аваз лугьузва, дидед чIал чун патал акьалтIай къиметлу ивир тирди къейдзава:
Ажуз я зун шиир кхьиз чIалакай,
ЧIехи Шагьдин кукIуш рехи кьвалакай.
Бейхабардиз хкатда сад къвалакай,
Лугьуда ваз, муькъвел кьван я лезги чIал.
Низ герек я, рекьел къван я лезги чIал
ЧIуру чIижер такурай заз Ватанда.
Хайи чIалан са тIем аваз зи танда,
Гьалал шиир тIушун хьанвай зи чанда.
Дидедин чIал гьар инсандиз пIир хьурай,
Зун алемдиз Лезги чIалал чир хьурай.
Мярекатдал рахай общественный деятель, МФТИ-дин радиотехникадин ва телекоммуникацийрин кафедрадин преподаватель Низами Абдулгьамидовани юбиляр тебрикна ва адан эсерриз виниз тир къимет гана.
Эхирдай юбиляр Эйваз Гуьлалиева ва мярекат кьиле тухвай Камран Къурбаналиева яратмишунрин и серенжемда иштиракайбуруз ва адан тешкилатчийриз мад сеферда рикIин сидкьидай сагърай лагьана.
«Лезги газет»
