Алай йисан 30-июндиз Ахцегьа 19-сеферда “Шарвили” эпосдин сувар кьиле фена. Ана, гьамиша хьиз, гзаф инсанри иштиракна. Шадвилин мярекатдин вахтунда чна бязи иштиракчийривай суварин гьакъиндай чпин фикирар лугьун тIалабна.
Гьазурайди — Рагьидин Эминов
Зун рази я
Гьар йисуз хьиз, цIини “Шарвили” эпосдин сувар тухвай тегьердилай зун гзаф рази я. За ам гьамиша тамарзудаказ гуьзетзава ва шаддиз суварик иштиракзава. “Шарвили” эпосдин сувар тек са лезгийрин ваъ, республикадин вири халкьарин вакъиадиз элкъвенва. Дуьшуьшдикай менфят къачуналди, къе заз, “Шарвили” эпос рикIел хкана, адан суварик кьил кутурбурукай сад тир ахцегьви бажарагълу алим, рагьметлу Агьед Агъаеваз, гьакI оргкомитетдин председатель, спонсор Имам Яралиеваз, сувар тешкилун патал еке кIвалах кьиле тухузвай райадминистрациядиз рикIин сидкьидай чухсагъул лугьуз кIанзава.
Агъахан БАГЪИРОВ, пенсионер
Машгьурвал артух жезва
За и суварин мярекатра гьар йисуз иштиракзава, гьикI хьи, ам чи халкьдин лап хъсан сувариз элкъвенва. Адан макьсад, метлеб гзаф важиблуди я. Дагъустандин халкьар тупламишзавай, ислягьвал, стхавал дуствал ва садвал мягькемарзавай эпосдин суварин машгьурвал къвердавай артух жезва. И сувариз гьазур хьунин рекьяй аквадай хьтин кIвалах тухузвай Ахцегьрин хуьруьн кьил Низами Эфендиев сагърай. Дагълара авай шегьер лугьузвай Ахцегьар къуй мадни авадан хьурай!
Нариман МУСАНАБИЕВ, пенсионер
Хуьрерани тешкилнайтIа…
Шарвили пагьливан лезги халкь садзавай, тупламишзавай кьетIен ярж, лишан я. Адан къаматди чи халкьдиз хас лап хъсан къилихарни лишанар умумиламишзава. И суварик Ахцегьиз лезги халкьдин илимдинни яратмишунрин интеллигенциядин векилар атуникди инсанрин ватанпересвилин гьиссер артух жезва. Гьавиляй за гьамиша чи хуьруьн культурадин кIвалин коллективдихъ галаз и чIехи суварик ашкъидалди иштиракзава.
Кьилинди, за халкьдин сувар вичин мурад-метлебдив агакьнавайди гьиссзава. “Шарвили” эпосдин сувар гьар са хуьрени кьиле тухуз хьанайтIа, мадни хъсан тир. И карди райцентрадиз суварик къвез тежезвайбурузни умуми шадвилера иштиракдай мумкинвал гудай.
Назир ЧУБАНОВ, Хуьруьгрин хуьруьн культурадин кIвалин директор
Гьамиша жанлу сувар
“Шарвили” эпосдин сувар лезги халкьдин дамах я! Гьар йисуз кьиле тухузвай и сувари милли чIал, халкьдин культура хуьниз, виликди тухуниз, инсанрин дуствилин алакъаяр мягькемаруниз, акьалтзавай несил эдеб-ахлакьдинни ватанпересвилин руьгьдаллаз тербияламишуниз къуллугъзава.
Ихьтин камаллу, девирди истемишзавай сувар арадал гъана, ам гьар йисуз тешкиллудаказ кьиле тухунал гзаф шад я.
Алирза АЛИРЗАЕВ, карчи
Еке метлеб ава
Милли чIал, халкьдин культура хуьнин, инсанрин дуствилин алакъаяр мягькемарунин карда и мярекатдихъ еке метлеб ава. Къе “Шарвили” эпосдин суварик асул гьисабдай багъри халкьдин гележег, кьисмет къайгъусуз тушир ватанпересар кIватI хьанва. Гьар патахъай пара хъсан ва метлеблу мярекат я. Шаксуз, ада чи рикIел фольклордин эсерар, гъилин-тупIун сеняткарвилер ва бубайрин лап хъсан адетар хкизва.
Гьакъикъатдани, халкь кьве патал пай хьанвай, ватанпересвал, руьгьдин ивирар квахьзавай и четин макъамда Шарвилидин игитвилин къаматди чи халкь уяхарзава, сад ийизва, дуствал мягькемарзава, баркаллу крарал руьгьламишзава. И кар аннамишна, чун, Сулейман-Стальский райондай 1500-дав агакьна, ватанперес, райондин кьил Нариман Шамсудиновичан регьбервилик кваз, Ахцегьиз атанва.
Ямудин СУРХАЕВ, Кьасумхуьруьн культурадин кIвалин художественный руководитель
