“Душманри, Лезгистандин винел мус гьужумна, квез тади гуз хьайитIани, куьне, хтана, кIелед хивяй “Шарвили!” “Шарвили!”  “Шарвили!” лагьана, заз пуд сеферда эвера. Гьа чIавуз зун атана, квехь галаз санал дяведиз фена, душманар дарбадагъда”.

Агъалар   Гьажиев.

(Лезги фольклор. Махачкъала. 1941-й. 17).

* * *

Алатнавай суварри къалурайвал, “Шарвилидин” сувар игитвилин эпосдинди, халкьдик игитвилин руьгь кутазвайди­ яз бейнидиз гьахьнава. Халкьди ам гуьзетзава. Яваш-яваш ам вири лезгияр санал агуддай чIехи мярекатдиз элкъвезва…­

Агьед  Агъаев, илимрин доктор-философ

* * *

БалкIан рекье кьейтIани,

Саламат яз пар амукьда.

И дуьньядал ажуздан сур,

Игит касдин тIвар амукьда!

Забит  Ризванов, шаир.

* * *

Шарвили тек туш, вучиз лагьайтIа, виринра чна ахьтин къагьримандал чан гъайи халкьдин невни гьиссзава. Шарвилидин далудихъ адан халкь гала.

Алирза  Саидов, шаир.

* * *

Багъри халкьдиз сергьят авачир кьван вафалу тир Шарвили вичин хийирдихъ галтугнавай кас ваъ, халкьдин динжвилихъ, генгвилихъ ялзавай кьегьал я. Халкь патал ам чанни къурбанд ийиз гьазур я.

Байрам  Салимов, Дагъустандин халкьдин шаир.

* * *

Чи халкь эхирни вич гзаф йисара тваз хьайи тилисимдай акъатзава. Адан рехъ бахтлувилихъ, дуьзвилихъ, ачухвилихъ, игитвилихъ элкъвенва. И  рекьяй ам вичин мурадрив агакьдайдал шак алач.

Ханбиче  Хаметова, Дагъустандин халкьдин шаир.

* * *

Шарвили галачиз халкьдиз я вичин чилин, я вичин чIалан, я вичин культурадин къадир жедач. Ахьтин халкь манкьуртриз элкъведа ва и дуьньядилай терг жеда. Къе лезги халкьдин милли идея вуч я? Ам авани? Гьеле аватIа чир жезвач… Эгер чна Шарвили рикIелай алуд тавуртIа, чахъ вири жеда.

Эседуллагь  Наврузбегов, драматург, РФ-дин лайихлу артист.