30-июндиз къадим Ахцегьа лезги халкьдин игитвилин “Шарвили” эпосдин нубатдин 19-сувар кьиле тухуда. Буюр, суварик илиф,  играми ватанэгьлияр!

“Шарвили” эпосдин сувар са лезгийрин ваъ, республикадин дережадин кьетIен серенжем, Дагъустандин вири халкьаринди я. Эхиримжи йисара суварин гурлу мярекатра уьлкведин общественный деятелри, къецепатан уьлквейрайни халкьарин интеллигенциядин векилри иштиракиз хьуникди ам Международный дережадин зурба вакъиадиз элкъвенва. Якъин, Кавказдани ихьтин метлеблу сувар авач жеди.

Жанлу эпосдин кьилин игит Шарвилидин къаматдалди ва сюжетрин куьмекдалди чи халкьдин руьгьдин гьайбатлувални къана­жагълувал къалурзава ва девирдин цIийи шартIара абур хуьн лишанламишзава. Лезги халкьдин милли руьгь, къанажагъ уяхарунал­ди, инсанар мергьяматлувилин крарал тупламишуналди ва ислягьвилин гьакъисагъ зегьметдалди халкьдин яша­йишдин агьвал­лувал хкажун, акьалтзавай несил бубайрин баркаллу крариз вафа­лу яз тербияламишун, Дагъустандин стха халкьарин дуствилин ала­къаяр мягькемарун — ингье эпосдин суварин асул мурад-метле­бар. Гьавиляй и сувар вирибуру хушдиз кьабулзава, чна адал да­махзава.

Лап бинедилай Ватандин азадвилинни аслу туширвилин ма­надин пак фикирарни гьакъикъи вакъиаяр себеб яз халкьдин бейни­да агъзур йисарин къене арадал атанвай зурба эсер я эпос. Адан къуват, таъсирлувал ва жегьил несил дуьз тербияламишу­нин карда мумкинвилер чи йикъара акьван зурбабур я хьи, чна адал лайихлудаказ дамахзава, гьакI суварин серенжемар тешкилзава. Адан бинедаллаз алимри илимдин ахтармишунар кьиле­ ту­­хузва. ЧIалан устадри ктабар кхьизва. Искусcтводин устадри чIе­­хи операярни тамашаяр сегьнеламишзава. Умудлу я, мукьвал­ гележегда “Шарвилидикай” талукь тир кинофильмаярни пайда жеда.

Эхиримжи 19 йисан девирда “Шарвили” эпосдин сувар чи бейнида, къанажагъда акI дурумлувилелди гьатнава хьи, гележегда адан идеяйрин куьмекдалди халкьдин экономикадин, сиясатдин, образованидин, культурадин пара месэлаяр гьялиз жеда. Гьавиляй чаз гьакьван багьа ва герек я и сувар.

Дашдемир Шерифалиев