Алай йисуз лезгийрин машгьур шаир, филологиядин илимрин доктор, Дагъустандин культурадин лайихлу работник, Урусатдин писателрин ва журналистрин союзрин член Фейзудин Рамазанович Нагъиеван 70 йис тамам хьана. Мукьвара Махачкъалада, Р.Гьамзатован тIварунихъ галай милли ктабханада, и вакъиадиз талукьарнавай мярекат кьиле фена. Ана жемиятдин, илимдин, яратмишдай интеллигенциядин, СМИ-рин векилри, аспирантри, студентри, мектебра кIелзавай аялри, милли эдебиятдал рикI алай ватанэгьлийри иштиракна.
Мярекатдал сифте гаф рахай ктабханадин къуллугъчи Секинат Мусаевади Фейзудин Нагъиеван ктабриз талукь яз гьазурнавай выставкадикай ихтилатна, юбилярдиз 70 йис тамам хьун мубаракна ва межлис кьиле тухун патал гаф “Лезги газетдин” кьилин редактор Мегьамед Ибрагьимоваз гана.
Вичин рахунра М.Ибрагьимова куьрелди шаирдин уьмуьрдин ва яратмишунрин рекьикай суьгьбетна. РикIел хкин, Фейзудин Нагъиев Агъа СтIалдилай я. Ада инженерно-строительный ва Москвада литературадин институтар акьалтIарна. Алай вахтунда алимди ДГУ-дин филологиядин факультетдин урус ва Дагъустандин чIаларин отделенида кIвалахзава. Ам ДГУ-дин Дагъустандин халкьарин литературайрин кафедрадин профессор я.
Фейзудин Нагъиеван шииратдин кьетIенвилерикай вичин рахунра гегьеншдиз гьикаятчи Абил Межидов (Сардар Абил) рахана. Къейд ийин хьи, ада шаирдин яратмишунрай филологиядин илимрин кандидатвилин диссертацияни хвенва. Ада гьакIни юбилярдив лезги писателрин Союздин патай (Сардар Абила вахтуналди и Союздин председателдин везифаяр тамамарзава) Гьуьрметдин грамота ва вичин патайни савкьатар вахкана.
Мярекатдин сергьятра аваз Дагъустандин халкьдин игит Алик Эфендиева юбилярдиз Дагъустандин бине кутур кьегьал хва Нажмудин Самурскийдин суьрет чIугунвай гъвечIи халича багъишна.
Фейзудин Нагъиеван яратмишунрикай чпин фикирар Дагъустандин халкьдин духтур Азедин Эсетова, РД-дин илимрин центрадин къуллугъчи, алим Саимат Юзбеговади, “Дагагропромпроект” институтдин генеральный директор Назим Ханбалаева, РД-дин писателрин Союздин лезги секциядин регьбер Владик Батманова, шаирдин яратмишунрай илимрин диссертация кхьенвай Ильвира Бабаевади, “Лезги газетдин” литературадин отделдин редактор Мердали Жалилова, шаир Максим Алимова, журналист Гуьлера Камиловади, алим Мариф Къадимова, Махачкъаладин 59-нумрадин юкьван мектебдин муаллим Репия Къарибовади, гьикаятчи Юрмет Нагъиева ва масабуру лагьана.
Шаир Абидин Камилова юбилей мубарак авунихъ галаз санал Фейзудин Нагъиевав Сулейман-Стальский райондин администрациядин кьил Нариман Абдулмуталибован патай тебрикдин чар вахкана.
Махачкъаладин 38-нумрадин гимназияда чирвилер къачузвай аялри ва ДГУ-дин филологиядин факультетдин студенткайри Ф.Нагъиеван шиирар кIелна. Иштиракчийри межлисдин сергьятра аваз шаирдин чIалариз кхьенвай манийрихъни яб акална.
Эхирдай Фейзудин Нагъиева вичин гьуьрметдай мярекатдиз атайбуруз сагърай лагьана ва вичин шииратдин алемдикай куьрелди суьгьбетна.
Агьмед Магьмудов
