Каспийск шегьердин 11-нумрадин гимназиядиз Дагъустандин халкьдин шаир СтIал Сулейманан тIвар ганва. И вакъиадиз талукьарнавай мемориалдин кьул ачухунин мярекатда РД-дин Гьукуматдин Председателдин заместитель Нариман Абдулмуталибова, РД-дин милли сиясатдин ва динрин крарин рекьяй министр Энрик Муслимова, Каспийскдин депутатрин собранидин председатель Абдулвагьид Жаватова, Каспийскдин мэрдин заместитель Руслан Учакаева, «Лезги газетдин» кьилин редактор Мегьамед Ибрагьимова, Дагъустандин писателрин союздин председатель Марина Агьмедовади ва масабуру иштиракна.
Мугьманар тебрик авуналди сифте гаф гимназиядин директор Мурад Идрисова лагьана. Ада къейд авурвал, СтIал Сулейманан яратмишунрин девлетлу ирс хуьнин ва адан экуь къамат эбеди авунин ниятдалди 11-гимназия шаирдин тIварцIихъ ядай къарар Каспийск шегьердин администрацияди кьабулна.
Мемориалдин кьул ачухайдалай кьулухъ мярекатдин иштиракчияр гимназиядин 1 ва 2-гьавайрин дегьлизра кардик кутунвай Дагъустандин халкьарин милли майданрихъ, СтIал Сулейманан уьмуьрдиз ва яратмишунриз талукьарнавай ва са жерге маса выставкайрихъ галаз таниш хьана.
Межлисдин асул пай актовый залда кьиле фена. Рахайбуру мад сеферда XX асирдин Гомеран лайихлувилер, ада Дагъустандин эдебият вилик финик кутунвай чIехи пай къейдна, шаирдин уьмуьрдин ва яратмишунрин рекьикай чпин фикирар лагьана.
Агьмед Магьмудов
