РагъэкъечIдай патан уьлквейрин халкьарин арада, гада хьайила, хизандиз, мукьва-кьилийриз гзаф шад жедай, вирида мубарак ийиз, пишкешар гъидай, гьайванар тукIваз, еке межлисар къурмишдай. Руш хьайила, «ам жедалди са вили къван хьанайтIа, хъсан тир, ам цла тваз виже къведай» лугьудай. Амма, гьикьван алакьунар аваз хьайитIани, рикI тIардай гададилай диде-бубадин, халкьдин разивал къазанмишдай, вирида вичел дамахдай, вич чешне яз къалурдай руш хъсан я.
Гьа ихьтин баркаллу дишегьлиди, алай вахтунда Хасавюрт райондин Къурушрин хуьре виридалайни яшлуди тир Алискерова Шагьсенем Рагьимовнади, и мукьвара вичин 100 йисан юбилей къаршиламишна. Ам 1925-йисан 15-мартдиз Вини Къурушдал малдаррин хизанда дуьньядал атана. Гила кьвед лагьай асирдиз къадамар вегьенвай Шагьсенем бадедиз — тамам са асир акунвай касдиз — жуван уьмуьрдикай са гъвечIи суьгьбет ая лагьайла, ада икI башламишна:
— Зи рикIел гьа Вини Къурушдал ва и ЦIийи Къурушдал хьайи вири крар, вакъиаяр лап хъсандиз алама. Чаз, и алай вахтунин аялриз хьиз, аялвал акурди туш, чун гьа кIвачи чил кьурдалай кьулухъ кIелеринни хиперин гуьгъуьна хьайибур я.
А йисара чи хуьре кьуд колхоз авай. Чи колхоз И.В. Сталинан тIварунихъ галай. Сентябрдин варз алукьнамазди, вири кIватI хьана, чун Азербайжандин чилерал куьч жедай. Аниз куьч жедайбурухъни гьардахъ вичин рекьер авай. Чи колхозни Тельманан колхоз са рекьяй фидай. Чи майишатриз Азербайжандин Къазимегьамедан тIварунихъ галай районда чкаяр къалурнавай. Рекьер лап хаталубур тир. Са тIимил инихъ-анихъ хьайитIа, крар чIур жедай — гзаф хаталу рагарин къаяяр авай, абур аватунни мумкин тир. Бедбахтвилин дуьшуьшарни хьанай. Гатфар алукьайла, чун Шагь дагъда авай яйлахриз хкведай. Гьа икI гьар йисуз, та иниз куьч жедалди.
Чи хизан шейэр дашмишдай вагонра аваз Куьрдемирдай гьа и цIийи чкадал кьван хтанай. Гьар са вагонда къад-къанни вад хизан жедай. Иниз хтайла, чун Бабаюрт райондин Шава лугьудай чкадал гвенар гуьз рекье тунай. Яшайишдин шартIар са акьван тарифлубур тушир. Чун нацIарикай туькIуьрнавай кумайрани чиликай атIанвай къазмайра яшамиш хьанай. Тапшурмишай вири кIвалахар чна намуслудаказ кьилиз акъуддай. Гад агуд хъувуна, чун ЦIийи Къурушрин макандал хтанай.
Гьелбетда, инани яшайишдин шартIар тарифдинбур тушир. Гьардаз чара авунвай участокрал цIийиз кIвалер эцигиз эгечIнавай. Вири дишегьлияр анжах керпичар атIунал машгъул тир, бригадаяр тешкилнавай. Зани рагьметлу Мамедов Мегьамед стхадин бригадада керпичар атIузвай. УстIарри лагьайтIа, кIвалер эцигзавай. Хуьре К. Марксан тIварунихъ галай колхоз арадал гъанвай. Кьуд пата кIвалахар къизгъиндаказ ргазвай, цIийиз ципицIрин багълар кутазвай. Зани рагьметлу Агъарзаев Алагьвердидин ципицIлухра гектарник яз кIвалахна, бул бегьерар къачуна. Дуланажагъдин шартIарни югъ-къандавай хъсан жез эгечIна.
Ихьтин зегьметрай Шагьсенем Алискерова «Баркаллу зегьметдай», «Кавказ хуьнай», «Социализмдин акъажунра зарбачи», «Зегьметдин ветеран» медалрин, пулдин премийрин ва маса шабагьрин сагьиб хьана. И мукьвара райондин администрациядин векилри адаз ЧIехи Гъалибвилин 80 йисан медаль гана.
Шагьсенем бадеди вичин уьмуьрдин юлдаш рагьметлу Абудер муаллимдикай ва хизандикай ихьтин келимаяр лагьана:
— Ватандин ЧIехи дяве куьтягь хьайидалай кьулухъ хуьруьз фронтовикар хквез хьана. Чнани абур игитар хьиз къаршиламишдай. Зи уьмуьрдин юлдаш Абудер Юсуфович лагьайтIа, старший лейтенант яз, дяве куьтягь хьайи са йисалай хтайди тир, ада гьеле къуллугъзамай. Иниз куьч хьайи ругуд йисалай чи кьисметар сад хьана, садан гаф садан туьтуьнилай физ, бахтлу уьмуьр кечирмишна. Ам муаллим тир.
Алай вахтунда зун зи хва, рагьметлу вичин бубадин пеше хкьунвай Борисахъ галаз санал яшамиш жезва. Зун зи хцелай, адан сусалай, хтулрилайни птулрилай гзаф рази я, абуруз зун эцигдай чка авач. Абурай заз са чIуру гафни, чIуру карни акунвач. Лугьудайвал, абуру зун «гъилерал кьуна» хуьзва. Алай вахтунда зи къуллугъда 4 хтулни 14 птул акъвазнава. Сагърай чеб! Чи виридан балайриз ислягь, бахтлу, берекатлу уьмуьрар кьисмет хьурай! Кьилел гьамиша михьи цав хьурай! За Сад Аллагьдивай дуьньяда ислягьвал хьун, Украинада кьиле тухузвай махсус серенжемда иштиракзавай чи балаяр сагъ-саламатдиз хтана, чпин диде-бубайрин рикIер шадардай йикъар акун тIалабзава.
Гьуьрметлу Шагьсенем баде, ваз юбилей мубаракрай! Куь хизанда мадни хушбахтлувал хьурай! Къуй Сад тир Аллагьдиз куь дуьайрин ван атурай! Дуьнья ислягь хьурай!
Гьажи Къазиев, муаллим,
РФ-дин журналистрин союздин член
