Юбилей
Алай йисан 5-апрелдиз шаир, писатель, журналист, Ахцегь райондин «ЦIийи дуьнья» газетдин виликан редактор Абдулрашид Гьажибубаевич Рашидов дидедиз хьайидалай инихъ 90 йис тамам жезва. Гьайиф хьи, чун адакай алатай вахтуна рахуниз мажбур жезва: 2018-йисуз ам кечмиш хьана.
Абдулрашид Рашидова хайи хуьре юкьван школа ва Даггосуниверситетдин филологиядин факультет куьтягьна. Гзаф йисара райондин «ЦIийи дуьнья» газетдин (1977-1997) редакторвиле кIвалахна. Адан шиирарни поэмаяр газетриз 60-йисара акъатиз башламишна. Абур «Чешме», «Вахтунин гьиссер», «Илгьамдин авазар» ва «Уьмуьрдин рекьер» кIватIалра гьатнава. Адан гзаф чIалариз композиторар тир Гьасанагъа Мурсалова ва Алемет Гьамзатова музыка кхьенва («Маяк Саимат», «Урусатдай атай руш» ва масабур). Мадни адан къелемдикай «Зайнаб» (1988) ва «Кьисас» (2005) повестар, «Имтигьан» (2009) роман хкатна. Писателдин эсеррин кьилин темаяр хайи Ватандиз, адан гуьзелвилиз, халкьдин яшайишдиз талукьбур тир.
1980-йисан октябрдиз КПСС-дин Ахцегь райкомдин бюродин къарардалди зун райондин «ЦIийи дуьнья» газетдиз жавабдар секретарвиле рекье туна. Даггосуниверситетдин филологиядин факультетдин урус чIалан отделение куьтягьнавай зал милли прессада кIвалахзавай сифтегьан девирда четинвилерни тIимил акьалтнач. Вири абурай агалкьунралди экъечIиз зи насигьатчи Абдулрашид Гьажибубаевича куьмекна.
Рагьметлудахъ галаз заз тамам 17 йисуз кIвалахун кьисмет хьана. А йисар за анжах хуш келимайралди рикIел хкизва. А вахтунда редакцияда яратмишдай дурумлу коллектив авай, финансрин гьални писди тушир, журналистриз вижевай гонорарни къазанмишдай мумкинвал авай, кIвалахда вири рекьерай гуьзлемишзавай агалкьунарни жезвай. Газетдин тираж Ахцегь ва Докъузпара районар сад тир чIавуз 4,5 агъзур экземплярдилай алатнавай, вични гьафтеда пуд сеферда акъатзавай. Советрин девирда шегьеррин ва районрин газетрин арада гьар йисуз конкурсар кьиле тухузвай. Дамахдивди къейд ийин: а конкурсра Ахцегь райондин «ЦIийи дуьнья» газетди кIвенкIвечи чкаяр кьазвай. А йисара гьар кварталдиз республикадин Госкомиздатди печатдин обзорар авай брошюраяр акъудзавай ва шегьерринни районрин газетрин пис ва хъсан терефар къалурзавай. Ихьтин обзорра А. Рашидов кьиле авай «ЦIийи дуьнья» газет гьамиша лап хъсанбурун жергеда жедай. Советрин девирда Абдулрашид Гьажибубаевич кьиле авай газет гьакъикъатдани халкьдиндаз элкъвена. Идан гьакъиндай неинки адан тиражди, гьакI чкайрал газетдин куьмекчияр тир мухбиррин кьадар 30-40 касдив агакьунини шагьидвалзавай.
Абдулрашид Гьажибубаевичан гзаф йисарин намуслу зегьметдиз республикади лайихлу къиметни гана. Ам ДАССР-дин культурадин лайихлу работник лагьай тIварцIин, «Дагъустан Республикадин вилик лайихлувилерай» ордендин, «Зегьметдин ветеран» медалдин сагьиб тир. Шаир, писатель, журналист ва хъсан инсан Абдулрашид Гьажибубаевич Рашидов ам чидайбурун рикIера эбеди яз амукьда.
Нариман Мамедов
