СтIал Сулейманан райондин кьил Саид Темирханова мукьвара яргъал йисарин намуслу зегьметдай Кьасумхуьруьн почтадин алакъадин почтальон Назират Мегьамедовадив муниципалитетдин Гьуьрметдин грамота вахкана, адаз шабагь мубаракна, кIвалахда агалкьунар хьун алхишна (шикилда).
— Назират Рагьимхановна фадлай кIвалахзавай, гьам коллективда, гьамни агьалийрин патай лайихлу гьуьрмет авай инсан, почтальон я, — лугьузва Кьасумхуьруьн почтадин алакъадин начальник Серёза Насрулаевади.
Назират Мегьамедовадиз грамота чнани мубаракна, адахъ галаз уьмуьрдин ва кIвалахдин рекьерикай, хизандикай ихтилатар авуна.
Шихидхуьре дидедиз хьайи Назирата 1977-йисуз Кьасумхуьруьн юкьван школа, Дагъустандин Огни шегьерда бухгалтерар гьазурдай училище, Кьасумхуьрел ачухай алишверишдин пешекаррин курсар акьалтIарна.
Вичин зегьметдин рехъ Н. Мегьамедовади Кьасумхуьрел «Союзпечатда» операторвиле кIвалах авунилай башламишна. Са шумуд йисуз ада райондин «Коммунизмдин гатфар» газетдин редакциядин патав гвай радиовещанида дикторвиле, райбольницада секретарвиле кIвалахна.
2003-йисалай инихъ Н. Мегьамедовади, винидихъ къейд авурвал, Кьасумхуьруьн почтадин алакъадин отделенида кIвалахзава. Ада агьалийрал газетарни журналар, посылкаяр, пенсийрин, пособийрин пулар вахт-вахтунда агакьарзава.
— Зи рикI почтальонвилел хьунихъ ихьтин себебни ава: рагьметлу диде Асията тамам 45 йисуз Кьасумхуьрел почтальонвиле кIвалахайди я, — лугьузва Назират Рагьимхановнади. — Чи кIвале жедай ихтилатарни газетрикайни журналрикай, почтадин работникрикай тир. Яргъал йисара Герейханован хуьруьн юкьван школада муаллимвиле кIвалах авур рагьметлу зи дахдин рикIни газетрал алай. Ада райондин ва республикадин газетриз макъалаярни кхьизвай. ГьакI хьайила, газетрихъни журналрихъ галаз алакъалу кIвалах давамарунал зун шадни я.
Назират Мегьамедовадихъ туькIвей, низамлу хизанни ава. Уьмуьрдин юлдаш Мегьамедахъ галаз санал ада пуд велед чIехи авуна. ЧIехи гада Гьажимурада Кьасумхуьрел алишверишдин идарада электрик, руш Валидади Махачкъаладин са школада урус чIалан муаллим, гъвечIи гада Ислама Москвада рекьеринни муькъверин карханада эцигунрин пешекар яз кIвалахзава. 7 хтулди Назират Рагьимхановнадиз кIубанвални уьмуьрдал кьарувал гузва.
Вахъ мягькем сагъламвал, хизанда хушбахтлувал, кIвалахда мадни агалкьунар хьурай, гьуьрметлу Назират Рагьимхановна.
Хазран Кьасумов
