Мукьвара Кьурагь райондин кьил Замир Азизов муниципалитетдин администрациядин образованидин отделдин начальник Эльмар Медетовахъ галаз санал Аладаш хуьруьн юкьван мектебдиз мугьман хьана. Ина абуру чкадин муаллимрин коллективдихъ галаз гуьруьш кьиле тухвана ва кIелдай 210 чка авай цIийи мектебдин дараматда кьиле физвай кIвалахрихъ галаз таниш хьана.
Аладашда цIийи мектеб эцигиз хейлин йисар я. Кьурагь райондин администрациядин пресс-къуллугъди хабар гузвайвал, и кардихъ жуьреба-жуьре себебар авай. Кьилинбурукай сад мектебдин дарамат эцигзавай чилин участокдин сергьятар тайинарун ва адаз талукь чарар-цIарар къайдадик кутун тир. Алай йисан 1-сентябрдиз цIийи мектебди аялар кьабулда.
Муаллимрихъ галаз кьиле фейи гуьруьшдал кIелунинни тербиядин кIвалахдиз талукь месэлаяр веревирдна. Мектебдин директор Мегьамед Абдуллаева жуьреба-жуьре рекьерай датIана куьмекар гунай муаллимрин коллективдин патай Замир Азизоваз сагърай лагьана.
Агьмед Магьмудов
