Алай вахтунда Дербент шегьерда агьалияр гзаф яшамиш жезвай микрорайонра, гзаф мертебайрин кIвалерин гьаятра спортдин майданар тадаракламишуниз артух фикир гуз эгечIнава. Анра машгъул хьуналди, шегьердин агьалийри чпин сагъламвал мягькемарзава, алакьунар къалурзава. Ингье и мукьвара шегьердин Хандадаш Тагъиеван куьчедин 33 “а” нумрадин гзаф мертебайрин кIвалерин гьаятда вири къулайвилер авай спортдин мад са майдан шад гьалара ачухна.
Кьилди къейдна кIандай кар ам я хьи, и цIийи майдан арадал гъиз куьмекайди “Арси-групп” компаниядин генеральный директор Расул Абдуллаев я. Майдан тадаракламишунин вири харжияр и мергьяматлу касди вичин патай авунва.
Спортдин цIийи майдан ачухуниз талукьарнавай шад мярекатда иштиракай шегьердин кьил Хизри Абакарова Р.Абдуллаеван тIварунихъ хуш келимаяр лагьана ва жаван спортсменриз футболдин тупар багъишна.
Нариман Къарибов
