И йикъара чаз чIехи магьрумвал хьана: чи лап нуфузлу инсанрикай сад, дявединни зегьметдин ветеран, гьуьрметлу буба ва чIехи буба Гьажи Кичибегович Гьажиев рагьметдиз фена. Чна, адан вири мукьва-кьилийри, багърийри адахъ яс чIугвазва, хизанриз сабурар гузва.
Гь.К.Гьажиев 1928-йисуз Ахцегь райондин (гила Докъузпара) Къаракуьре хуьре лежбердин хизанда дидедиз хьана. Ина ирид йисан школа, Хасавюртда хуьруьн майишатдин техникум акьалтIарна.
1945-1948-йисара хайи хуьре колхоздин агрономвиле кIва-лахна.
1948-1951-йисара Советрин Армиядин жергейра къуллугъна. Гьана амаз частунин комсомолдин тешкилатдин бюродин секретарвиле хкяна. Аскервиляй хтайдалай кьулухъ комсомолдин Докъузпара райкомда кIвалахна, 1953-йисуз ина сад лагьай секретарвиле хкяна.
1954-1957-йисара Буйнакскдин финансрин техникумда кIелна. Ахпа хейлин йисара РСФСР-дин ва ДАССР-дин финансринни контролдин къурулушра контролер-ревизорвиле, 1965-1975-йисара Ахцегьрин дагъларинни дуьзенрин хуьруьн майишатдин тежрибайрин станцияда кьилин бухгалтервиле къуллугъна. Адалай кьулухъ вичин пешедай государстводин ва хсуси тешкилатра, эхиримжи вахтундани Афгъанистанда телеф хьайи хва Сократан тIварунихъ янавай эцигунрин фирмада кIвалахзавай.
Гьажи Кичибегович руьгьдай хци, бедендиз мягькем инсан, хизандин рикI алай буба, хтулар, птулар тербияламишзавай чIехи буба тир. Ада хайи хуьруьн, райондин, республикадин экономика, яшайишдин шартIар вилик тухуник вичин пайни кутуна.
Уьмуьр гьикьван кадгъайди хьайитIани, адахъни, гьайиф хьи, эхир ава. Гьажи Кичибеговични чи арадай яргъал чIугун тавур залан азарди садлагьана акъудна.
Чна адан хва Саруханаз, рушариз — Тайибатаз, Гуьлперидиз, Минарадиз, свас Наидадиз, хтул Сократаз, дериндай хажалат чIугунивди, башсагълугъвал гузва. Гьажи Кичибеговичан экуь къамат садрани чи рикIелай алатдач.
Рагьметлудахъ яс чIугвазвай Сабир, Айшат, Эмирсултан, Надир, Шагьнабат, Лаура, Сейфедин Наврузовар.
