Мукьвара чпин ери-бине Докъузпара райондин Къаракуьредай тир Алан ва Рамазан Абдулкеримоври (стхаяр тир Исмаиланни Фаридан рухвайри) спортдин рекье къазанмишай агалкьунри неинки чпин сихил, гьакI хуьруьнвиярни шадарна. Хтулрин агалкьунри дамахдин гьиссер гзафни-гзаф абурун чIехи буба Завир Шагьисмаиловичак кутуна.
Алан ва Рамазан Докъузпара районда вирибуруз сейли агъсакъал, “Хайи чилиз авай кIанивиляй” республикадин шабагьдин сагьиб Завир Абдулкеримован хтулар я. Абурун сихилда спортдин рекье агалкьунар къазанмишавайбур мадни ава. Жаван спортсменри чпин ими, 90-йисара дзюдодай Европадин чемпионвилин тIвар къазанмишай Замиралай чешне къачузва. Адан хва Гьамзатни спортдин и жуьредай чIехи агалкьунар къазанмишнавай пагьливан я.
Алан 2004-йисуз Дербентда дидедиз хьана. Алай вахтунда ада шегьердин 15-нумрадин мектебда 9-классда кIелзава. Гьеле 5-классда амаз ам 5-нумрадин ДЮСШ-да тренер-насигьатчи Фейзулла Халилован гъилик дзюдодал машгъул жез гатIунна. Спортдал машгъул хьайи сифте йисарилай ада, акъажунра кIвенкIвечи чкаяр кьуналди, вичихъ спортдин и жуьредай бажарагъ авайди субутзава.
Аланахъ галаз санал адан имидин хва Рамазанни винидихъ тIвар кьунвай спортдин мектебда 2014-йисалай дзюдодал машгъул я. Ада Дербентдин 18-нумрадин мектебда 9-классда кIелзава. Са тренердин гъилик вердишвилер къачузвай пагьливанрикай дуьньядин майданра гъалибвилер къачудай кьегьалар хьун чи мурад я.
Куругъли Ферзалиев
