4-ноябрдиз, Халкьдин садвилин юкъуз, Махачкъалада и сувариз талукьарнавай са жерге мярекатар кьиле фена. Абурукай сада – «Вместе мы — Россия» лишандик кваз кьиле фейи халкьдин медениятдин фестивалда РД-дин Гьукуматдин Председатель Абдулмуслим Абдулмуслимовани иштиракна.
Фестиваль республикадин меркездин кьилин майдандал Россиядин Федерациядин Пайдахдиз талукьарнавай серенжем кьиле тухунилай гатIунна. Гуьгъуьнлай фестиваль Халкьдин садвилин йикъаз талукьарнавай гала-концертди давамарна. Мярекатдин иштиракчийрин вилик Росгвардиядин 102-кьилдин бригададин Военный оркестр, республикадин машгьур манидарар, кьуьлердайбурун ансамблар экъечIна. И юкъуз мад Махачкъалада «Рисуем мир» лишандик кваз жегьилрин арт-майданни тешкилнавай.
А. Абдулмуслимов фестивалдин иштиракчийрихъ, са жерге мугьманрихъ галаз рахана. Абурун арада медениятдин, ТОКС-дин, жемиятдин жуьреба-жуьре тешкилатрин векилар, волонтерар ва масабур авай.
4-ноябрдиз Халкьдин садвилин йикъаз талукьарнавай мярекатар Дагъустандин маса шегьеррани, районрани кьиле фена. Абурукай гегьеншдиз «Лезги газетдин» сайтдай кIелиз жеда.
Чи мухбир
