5-ноябрдиз РД-дин Гьукуматдин Председатель Абдулмуслим Абдулмуслимова Запорожьедин областдин Михайловский райондиз куьмекар гунин жигьетдай арадал атанвай суалриз талукьарнавай совещание кьиле тухвана. Адан кIвалахда Михайловский райондин кьил Вячеслав Беднякани иштиракна.
«Михайловский район областда чIехибурукай сад я, адак 48 хуьр акатзава. РФ-дин Президентдин Указдал асаслу яз, и район арадиз хкун ва адаз куьмекар гун Дагъустандин хиве ава. И макьсадриз чи республикадин бюджетдай пулдин кьилдин такьатарни чара ийизва.
Идалай вилик Дагъустандин Кьил Сергей Меликовахъ галазни гуьруьш кьиле фена. Адани Михайловский райондив герек куьмек агакьаруниз кьетIен фикир гузва. Исятда чи вилик сифте нубатда гьялна кIанзавай месэлаяр тайинарун акъвазнава…», — лагьана А. Абдулмуслимова.
Вичин нубатда Вячеслав Бедняка Дагъустандин кьилевайбуруз, вири дагъустанвийриз райондиз куьмекар гунай сагърай лагьана ва Дагъларин уьлкведикай, ина яшамиш жезвай агьалийрин мугьманпересвиликай вичин фикирар лагьана.
Къейд ийин хьи, алатай йисуз Дагъустанди Михайловский районда 23 объект цIийикIа туькIуьр хъувуна. Алай йисуз планда 16 объект ава. Къенин юкъуз абурукай 11 объектдал кIвалахар тамамдиз акьалтIарнава.
Гегьеншдиз РД-дин Гьукуматдин сайтдай кIелиз жеда.
Агьмед Магьмудов
