26-апрелдиз Москвада, Урусатдин илимрин академиядин концертрин залда, лезгийрин милли медениятдин федеральный дережадин автономия (ФЛНКА) арадал гъайидалай инихъ 25 йис тамам хьуниз талукьарнавай шадвилин мярекат кьиле фена.
ФЛНКА 1999-йисуз тешкилнавай лезгийрин жемиятдин чIехи центрайрикай сад я. Ам РФ-дин Президентдин патав миллетрин арада алакъайрин рекьяй Советдик кутунва. Идалай гъейри, ФЛНКА ООН-дин патав консультативный дережа ганвай Урусатдин милли медениятдин тек са автономия я.
Юбилейдин межлис, сифте гаф рахуналди, ФЛНКА-дин Советдин председатель Ариф Керимовани президент Васиф Гьасанова ачухна. Гуьгъуьнлай сегьнедиз РФ-дин Президентдин Администрациядин Руководителдин заместителдин аппаратдин регьбер Андрей Ротэрмель экъечIна. Ада ФЛНКА-дин векилриз РФ-дин Президентдин Администрациядин Руководителдин заместитель Мегьамедсалам Мегьамедован патай юбилей мубаракна ва абурув разивилин чарар вахкана.
Сувар мубарак авурбурун арада гьакIни РФ-дин миллетрин крарин рекьяй кардик квай Федеральный Агентстводин кьилин заместитель Станислав Бедкин, РД-дин милли сиясатдин ва динрин крарин рекьяй министр Энрик Муслимов, РД-дин Халкьдин Собранидин депутат Марат Алияров, Москва шегьердин администрациядин векил Иван Петров, куьрдерин, азербайжанрин, гуржийрин, эрменийрин милли автономийрин регьберар ва масабур авай.
Межлисдин сергьятра аваз са шумуд касдив ФЛНКА-дин юбилейдихъ галаз алакъалу яз арадал гъанвай «Лезги халкьдин дамах» медалар вахкана. Шабагьдиз лайихлу хьайибурун арада ФЛНКА-дин Советдин председатель, РФ-дин Президентдин патав миллетрин арада алакъайрин рекьяй Советдин член Ариф Керимов, «Самур» газетдин кьилин редактор, машгьур шаир, журналист Седакъет Керимова авай. Абурув медалар Васиф Гьасанова вахкана. Къейд ийин хьи, медалдиз лайихлу хьайибурун арада гьакIни РД-дин Халкьдин Собранидин депутат, меценат Имам Яралиевни авай. Амма адавай юбилейдин мярекатда иштиракиз хьанач.
Юбилейдихъ галаз алакъалу яз, ФЛНКА-ди «Лезги гъед» тIвар алай мад са премия арадал гъанва. Лезги гамунал жезвай гъетрен кIалубда аваз туькIуьрнавай статуэткаярни меценатрин патай пулдин пишкешар илимдин, медениятдин образованидин хилерин векилрив, кьилдин тешкилатрив вахкана. Абуру арада «Лезги газетдин» редакция (кьилин редактор – Мегьамед Ибрагьимов), Лезги театр (директор – Динара Эминова), мергьяматлувилин «ЛЕКИ» фонд (генеральный директор – Гьасан Гьасанов), РАН-дин востоковеденидин институтдин директор Аликбер Аликберов, Дагъустандин халкьдин шаир Майрудин Бабаханов, Хив райондин ЦIинитIрин хуьруьн мектебдин лезги чIалан муаллим Сейфуллагь Шагьмарданов, диндин алим Ямин Мегьамедов, Гьажи Давудан тIварцIихъ галай центрадин регьбер Самур Алиев ва Сад лагьай каналдин эфирдиз акъатзавай «Лучше всех» программада лезги халкьдин тарихдикай суьгьбет авур Алиса Къулиева авай.
Юбилейдин мярекат лезги халкьдин машгьур манидарри тамамарай манийри, «Лезгинка» ансамблдин векилри авур кьуьлери, симинин пагьливан Расул Абакарова къалурай нумрайри мадни гурлу авуна.
Агьмед Магьмудов
