6-майдиз Дагъустандин Кьил Сергей Меликован регьбервилик кваз кьиле фейи совещанидал Гъалибвилин сувариз гьазурвилер акунин, етим ва диде-бубадин къаюмвиликай магьрум хьанвай аялар яшайишдин кIвалералди таъминарунин, гатун вахтунда аялри ял ягъунин, туризмдин хел вилик тухунин ва са жерге маса месэлаяр веревирдна…
Совещанидал РД-дин образованидин ва илимдин министр Яхья Бучаева хабар гайивал, гатуз Дагъларин уьлкведа 241 лагерь кардик акатда ва анра 37 агъзурдалай виниз аялри ял яда.
Ял ягъиз, Дагъустандиз Урусатдин цIийи регионрайни 750-дав агакьна аялар къведайвал я. Идалай гъейри, Белгороддин областдайни 500 аял атун вилив хуьзва. Абур «Анжи-мастер» ва «Солнечный берег» лагерри кьабулда.
…РД-дин эцигунрин, архитектурадин ва ЖКХ-дин министрдин везифаяр вахтуналди тамамарзавай Салам Гьасайниеван гафаралди, алай йисан эхирдалди Дагъустанда 300 етим аял кIвалералди таъминарда. И макьсадриз республикадин бюджетдай цIи 820 миллион манат пул чара авунва.
Къейд ийин хьи, чпин яшар 23 йисав агакьнавай етим аялривай цIийи кIвалер маса къачун ва я ипотекадин кредитдин бурж вахкун патал махсус сертификатрикай менфят къачуз жеда. Эгер шаз сертификатдин такьатрихъ кIвалер анжах республикадай къачуз жезвайтIа, цIинин йисалай Дагъустандилай къецепатайни къачудай мумкинвал ава.
Гегьеншдиз РД-дин Кьилин сайтдай кIелиз жеда.
Агьмед Магьмудов
