27-апрелдиз Хив райондин Агъа АрхитIрин хуьре Ватандин ЧIехи дяведа фашистрихъ галаз тухвай женгера телеф хьайи Советрин Союздин аскерриз зурба мемориалдин комплекс ачухуниз талукьарнавай мярекат кьиле фена.
Межлис атанвай гьуьрметлу мугьманрин арада РД-дин Гьукуматдин Председателдин заместитель, генерал-майор Рамазан Жафаров, ОДКБ-дин тешкилатдин кьушунрин къуватрин (Эрменистан, Белоруссия, Къазахстан, Къиргъизия, Тажикистан) векилар, РД-дин Халкьдин Собранида РД-дин Кьилин патай ихтиярар авай векил Нуьсрет Омаров, РД-дин Хатасузвилин советдин секретарь Мегьамед Баачилов, «Завтра» газетдин редактор, писатель, жемиятдинни сиясатдин деятель Александр Проханов, СВО-дин Игитар, РФ-дин оборонадин министерстводин генералар, Афгъанистандин ва маса женгерин вакъиайрин ветеранар авай.
Мярекат РФ-дин ва РД-дин гимнар тамамарунилай гатIунна.
Хив райондин кьил Ярмет Ярметова мярекат ачухдайла къейд авурвал, Агъа АргъитIа эцигнавай мемориалдин комплекс — им гъалибчияр кьадар авачир кьван эбеди яз рикIел хуьнин лишан я.
— Ватандин ЧIехи дяве гатIунай сад лагьай йикъалай Хив райондин агьалияр Ватан хуьз къарагъна. Ингье Ватандин ЧIехи дяве акьалтна 79 йис хьанва. Йисар мадни фида. Са шумуд несил дегиш жеда, амма халкьдин рикIелай садрани чи бубайрин кьегьалвилер алатдач, — лагьана ада.
— Гьуьрметлу дустар, за чи райондин вири агьалийрин патай ватанпересвилин мемориалдин комплекс эцигуник пай кутур гьар садаз сагърай лугьузва. Дугъриданни, им халкьдин тимтал я. И зурба гуьмбет арадал гъун патал акъатзавай вири харжияр вичин хивез къачур халкьдин кьегьал хва, меценат Альберт Эмиргъаеваз ва эцигунин кIвалахрал гуьзчивал авур ОДКБ-дин кризисрин центрдин начальник генерал-майор Арсен Рагьмановаз кьилди сагърай лугьуз кIанзава, — алава хъувуна Я.Ярметова.
Гуьгъуьнлай мярекатдал Рамазан Жафаров рахана.
— Гьуьрметлу жемят, багьа мугьманар! Ингье 79 йис алатнава чи азабар акур чилиз ислягьвал атана. Чна гъалибвал къазанмишай несилдиз кьил агъузна икрамзава. Гъалибвилин суварин вилик аскерриз тимталар ачухун, абурухъ гелкъуьн, михьивилер авун адетриз элкъвенва. Къе чун ина кIватI хьанвай вакъиади гьич садни фикир желб тавуна тадач. Къе чна, фашизм терг ийиз женгера телеф хьайи аскерриз тимтал ачухуналди, вахтарин алакъа гуьнгуьна хутазва. Гъалибвилин сувариз чна чи уьлкведал дамахзавайди кьатIузва ва Ватандин ЧIехи дяведин вахтунда телеф хьайи инсанрин кьисметрихъ галаз алакъа авайди гьиссзава. Дяведа телеф хьайибур рикIел хуьнин лишан яз, са декьикьада кисна акъвазун теклифзава.., — лагьана РД-дин Гьукуматдин Председателдин заместителди.
Мярекатдин сергьятра аваз Рамазан Жафарова ватанпересвилин рекьяй чIехи кIвалах тухунай ва гьакъисагъ зегьметдай Альберт Эмиргъаевав РД-дин Гьукуматдин гьуьрметдин шабагь вахкана.
ОДКБ -дин делегациядин патай анал Беларусь Республикадин кьушунрин къуватрин векил Людвиг Катков рахана.
«Гьуьрметлу суварин мугьманар! Чна чаз ислягь уьмуьр таъминарнавай аскерар са шумуд йисар алатайлани гьуьрметдалди рикIел хуьзва. Чи кьилин везифа гьикьван азабар эхна а гъалибвал чаз гьатнатIа, рикIелай ракъур тавун я. Чна кьетIен гьуьрмет ийизва дяведин ягъунрин ветеранриз, чандилай гъил къачуна, далу пата зегьмет чIугур ватанэгьлийриз. Игитриз эбеди баркалла!».
Ахпа гаф Александр Прохановаз гана.
«Гьейранардай, экв алай, гзаф гуьзел Гъалибвал, саки 80 йис алатнаватIани, ам неинки зурба военный сувар, идеологиядин сувар хьиз, ам гьукуматдин геополитикадин гужлувилин сувар хьиз, чи вилик акъазнава.
Пак дяведа мистикадин гъалибвал къазанмишнавай халкьдай яз хьун гьикьван бахтлувал я! Бахт тушни, цIуд йисаралди чи гьар садан рикIе: жавандин, агьилдин, аялдин и чIехи Гъалибвилин къамат аваз хьун. Яшамишрай Гъалибвал!».
РФ-дин Игит, генерал-полковник Рустам Мурадова Альберт Эмиргъаевав «За укрепление боевого сотрудничества” медаль, СССР-дин Игит, полковник Наби Акрамова Рамазан Жафаровав «ОДКБ тешкилатдин 20 йис» юбилейдин лишан вахкана. «ОДКБ тешкилатдин 20 йис» юбилейдин лишананриз, гьакIни Мусаэфенди Велимурадов ва Ариф Бугатиловни лайихлу хьана.
Агъа АрхитIа мемориалдин комплекс арадал гъун патал гзаф зегьметар чIугур Альберт Эмиргъаева, мярекатдиз атай виридаз сагърай лагьана, давамна: «Ватандин ЧIехи дяве, чи уьлкведин тарих рикIел хуьн, игитрин чешнейралди акьалтзавай несил тербияламишун — им чи буржи ва везифа я. Иниз килигна за и кIвалах хиве кьуна, кьилизни акъудна. Сагърай куьн вири!».
Мемориалдин комплекс ачухдай ихтияр Р. Жафароваз, А. Эмиргъаеваз ва А. Прохановаз гана.
Мярекат мемориалдин комплексдал цуькверин кIунчIар эцигуналди ва рикIел аламукьдай шикил ягъуналди акьалтI хьана.
Къагьриман Ибрагьимов
Шикил – Альберт Мегьтиханован
