Алатай жуьмя юкъуз Махачкъалада, Дуствилин КIвале, Россиядин Федерациядин къенепатан крарин къуллугъчийрин Югъ шад гьалара къейдна. Мярекатда Дагъустандин Кьил Владимир Васильева, республикадин Гьукуматдин членри, РД-дин къенепатан крарин министр, полициядин генерал-лейтенант Абдулрашид Мегьамедова, Россиядин ФСБ-дин Дагъустанда авай Управленидин начальник Олег Усова, республикадин къанун-къайда хуьдай къурулушдин подразделенийрин кьиле авай ксари, Дагъустандин МВД-дин ва Росгвардиядин векилри иштиракна. Анал кIвалахда тафаватлу хьайи къуллугъчийрив наградаяр вахкана…
Мярекат кIватI хьанвайбуруз сувар тебрикуналди Абдулрашид Мегьамедова ачухна. Ада республикадин районра ва шегьерра, гъиле яракь аваз, четин ва хаталу шартIаризни килиг тавуна, агьалийрин хатасузвал таъминаруналди, чпин къуллугъдин везифаяр намуслудаказ кьилиз акъудзавай ксариз чухсагъул малумарна.
— Къенепатан крарин органра кIвалахзавайбурун уьмуьр гьар юкъуз хаталувилик акатунихъ галаз алакъалуди я. Чпин къуллугъдиз вафалувал къалуруналди телеф хьайибурни тIимил авач. Уьлкведин абадвал, чи веледрин гележег патал чанар гайи кIвалахдин юлдашрин экуь къаматрин вилик чна кьилер агъуззава. Къуллугъдин четин уламрай экъечIай, хаталувилерин вилик кьил агъуз тавур чи гьуьрметлу ветеранризни чна рикIин сидкьидай ва еке гьуьрметдивди сувар тебрикзава. Куь чирвилерихъ ва тежрибадихъ къимет авач. Куьне кутур адетар, несилрилай несилрал къвезвай ирс чна гьамиша къайгъударвилелди хуьда. Чахъ галаз санал, итимрихъ галаз къуьн-къуьне аваз, дишегьлийрини-жергединбур, офицерар яз ва чпин гуьгьуьлдалди гьакъидихъ кIвалахал акъвазнавай ксари къуллугъзава. Абуру вирида чпин хиве авай везифаяр гьакъисагъвилелди, намуслувилелди кьилиз акъудзава. Зун чи къуллугъчийриз ихтибарлу далу пад таъминарзавай абурун уьмуьрдин юлдашрилай, диде-бубайрилай, аялрилай рази я. Абурун куьмек галачиз, чи къуллугъ мадни четинди жедай. Абур себеб яз, къанун-къайда хуьдай органра зегьмет чIугвазвай ксари, къуллугъдин ва женгинин хаталу везифаяр кьилиз акъуддайла, игитвилер къалурзава. За МВД-дин вири къуллугъчийрихъ ва чи гьуьрметлу ветеранрихъ сагъламвал, хушбахтлувал хьун алхишзава! Сувар мубаракарай, гьуьрметлу дустар! Ватандиз къуллугъунай куьн сагърай!-лагьана Абдулрашид Мегьамедова.
Владимир Васильева къенепатан крарин министерстводин кьиле авай ксариз ва вири къуллугъчийриз сувар тебрикна. абуру виридалайни четин ва акьалтIай важиблу пешейрикай сад кьилиз акъудзавайди, къуллугъдин везифаяр намуслувилелди тамамаруналди, чпихъ виниз тир пешекарвал авайди гьар юкъуз субутзавайди къейдна.
Мярекатдал Олег Усова ва масабуруни министр Абдулрашид Мегьамедоваз ва министерстводин вири къуллугъчийриз сувар тебрикна.
Гуьгъуьнлай кIвалахдин везифаяр кьилиз акъуддайла тафаватлу хьайи къуллугъчийрив Владимир Васильева, Абдулрашид Мегьамедова, Олег Усова медалар ва грамотаяр вахкана.
Мярекат еке концерт гуналди акьалтIна. КIватI хьанвайбурун гуьгьуьлар “Лезгинка” ансамблди, Дагъустандин халкьдин ва лайихлу артистри мадни хкажна.
* * *
10-ноябрдиз кIвалахдин везифаяр кьилиз акъуддайла телеф хьайи ксариз Дагъустандин МВД-дин вилик хкажнавай мемориалдал цуьквер эцигуниз талукь мярекатни кьиле фена. Ана министр, полициядин генерал-лейтенант Абдулрашид Мегьамедова, подразделенийрин кьиле авай ксари, МВД-дин патав гвай Общественный советдин членри, МВД-дин ва республикада авай Росгвардиядин Управленидин къуллугъчийри иштиракна.
Чи мухбир
