МЕСЭЛА КЪАРАГЪАРЗАВА

Дуьньядин винел машгьур инсанар тIи­мил­ хьанач. А ксарин тIварарни, чпелай гуьгъуьниз зурба ирс турвиляй, несилрин мецел­ни рикIел алама. Халкьдиз истеклу хьайи Етим Эминахъ, СтIал Сулейманахъ, Кьуьчхуьр Саидахъ галаз санал чавай Дагъустандин пешекар музыкадин буба Готфрид Алие­вич Гьасанован тIварни кьаз жеда, гьикI хьи, Етим Эмина лезги литературада гьихьтин гел тунатIа, Готфрид Алиевича неинки лезгийрин, вири Дагъустандин музыкада вичин мидаим гел туна.

Машгьур ксарин къаматар несилрин ри­кIерал хуьн адетдиз элкъвена, абуруз гуьмбетар эцигзава, тIварарихъ куьчеяр, дараматар, идараяр язава. Месела, Махачкъалада Урусрин театрдин вилик Расул Гьамзатоваз, чIехи шаир СтIал Сулейманаз вичин тIва­рунихъ галай багъда, Етим Эминаз Эминхуьрел, Алибег Фатаховаз Цмурдал ва икI мад памятникар хкажнава.

Халкьдин илгьамдиз элкъвена, чирагъ  хьиз кайи Готфрид Гьасанован руьгьдиз и дережадин гьуьрмет авунвач. Дугъри я,  Дербент шегьерда бажарагълу композитор хайи кIвалерин цлал рикIел хуьнин кьул алкIурна­ва ва 1926-йисуз Махачкъалада ада тешкилай музыкадин училищедиз 1965-йисалай Гьасанован тIвар ганва.

Гьич садазни сир туш, Гьасанова Буйнакскда сифте музыкадин техникум ачухна (1926), Дагъустандин пешекар музыкада сифте опера кхьена (1937), сифте балет эцигна (1945), СССР-дин композиторрин Союздин­ Да­гъустандин отдел (1954) тешкилна ва, идалайни алава яз адакай кьве сеферда Сталинан премиядин лауреат хьана (1949, 1951). Готфрид Гьасанова халкьдин музыкадин яратмишунар кIватI хъувун патал сад лагьай­ экспедицияда иштиракна (1921). Бажарагълу композиторди Дагъустандин музыкадин искусство вилик тухун патал икьван кIвала­хар авунатIани, несилди ам памятник эцигуниз лайихлуди тушиз гьисабзава жал? Готфрид Гьасанов несилрин рикIелай алатуниз чна рехъ гана виже къведач.

Памятникар эцигунин жигьетдай чи республика вилик фенва. Дагъустандин меркез тир Махачкъаладин куьчейра къекъвена хьайитIа, чаз ана колхозрин председателриз, наркомриз, обкомрин секретарриз, писателриз эцигнавай памятникар аквада, амма вучиз ятIани Готфрид Алиевич абурун арада авач. Ихьтин карди неики са зи, гьакI музыкадал рикI алай вири инсанрин гуьгьуьларни  чIур­зава. Культурадин министерст­водихъ галаз санал и кар Дагъустандин композиторрин Союздини гъиле кьунайтIа пис жедачир.

Эдуард Ашурагъаев