Кьасумхуьрел, Ибадулагь Тагьирован тIварунихъ галай медениятдин маканда, вичел гьеле чан аламаз «Адалатдинни инсанвилин рехъ хкягъай шаир ва муаллим» тIвар акьалтай Абдурагьман Межидович Межидован 90 йис тамам хьуниз талукьарнавай шад мярекат кьиле фена. Ам СтIал Сулейманан райондин администрациядин, лезги писателрин Союздин куьмекни галаз райондин культурадин отделди тешкилнавайди тир.
Юбилейдин мярекатдиз Махачкъаладай, Дербентдай, Каспийскдай, Кьурагь, Хив, Мегьарамдхуьруьн ва маса районрай яратмишдай интеллигенциядин векилар, рагьметлудан ярар-дустар, адан яратмишунрал рикI алай гзаф инсанар атанвай. Мярекатдал рахайбурун арада СтIал Сулейманан райондин депутатрин Собранидин председатель Штибег Мегьамедханов, Дагъустандин халкьдин шаир Майрудин Бабаханов, Сардархуьруьн юкьван школадин ученица Анзира Мустафаева (ада шаирдин уьмуьрдин ва яратмишунрин рекьикай гегьенш доклад авуна), писатель ва таржумачи Гьажи Ильясов, шаирдин хва Сардар Абил ва масабур авай. Абуру А.Межидован инсанвилин, пешекарвилин ерияр къейдна, шаирдин эсеррикай чпин фикирар лагьана.
Сардар Абила вичин бубадин гьуьрметдай гурлу мярекат тешкилунай райондин администрациядиз, лезги писателрин Союздиз ва райондин культурадин отделдиз, мярекатда иштиракай вири юлдашриз рикIин сидкьидай сагърай лагьана ва Абдурагьман Межидованни вичин шиирар кIелна.
Хазран Кьасумов
