25-декабрдиз РД-дин Кьил Сергей Меликова алай йисуз яшайишдин жуьреба-жуьре хилера тафаватлу хьайи са жерге дагъустанвийрив гьукуматдин шабагьар вахкана.
«ЦIийи йисан вилик заз квехъ галаз санал чи кьегьал ватанэгьлийрин агалкьунрикай рахаз хуш я. Куьне гьакъисагъ зегьметдалди распублика вилик финик, Дагъларин уьлкведин меденият девлетлу авуник еке пай кутазва. За квез менфятлудаказ кIвалахунай, куь пешекарвиляй, жавабдарвиляй сагърай лугьузва», — лагьана Сергей Меликова, мярекатдин иштиракчияр тебрикдайла.
Республикадин Кьили къейд авурвал, Дагъустанда здравоохраненидин объектар, мектебар, аялрин бахчаяр, спортзалар эцигун, цIийикIа туькIуьр хъувун давам жезва. Инвестицияр желб авунин жигьетдай кIвалах кьиле тухузва, яшайишдин хел хъсанарзава. 2024-йисуз Дагъустандихъ образованидин, медениятдин, спортдин, хуьруьн майишатдин хилерани чIехи агалкьунар хьанва. «Вири и крарин кьулухъ куьн, куьне чIугвазвай зегьмет гала», — давамарна Сергей Меликова шабагьар вахкудайла.
Жуьреба-жуьре шабагьриз муаллимар, артистар, духтурар, карханайрин регьберар ва масабур лайихлу хьана. Абурун арада Дагъустандин образованидин центрадин директор Анжела Байрамбегова, подполковник Ибрагьим Бебеков, «Лезгинка» ансамблдин регьбер Жамбулат Мегьамедов, журналист Генжеви Гьажибалаев ва масабур ава.
Агьмед Магьмудов
