Регионда кафейривай ва ачух балхунар галай ресторанривай, недай-хъвадай суьрсетдинбур ту­шир кура-кура метягьар маса гузвай, алишверишдин залдин майдан 800 квадратный метрдилай гзаф туширбур тир туьквенривай, са бязи чирвилер гудай тешкилатривай, мискIинривай ва ибадатханайривай кIвалах башламиш хъувуртIа жеда. Идакай РД-дин Кьилин сайтди хабар гузва.

Дагъустан коронавирус себеб яз кардик кутунвай сергьятламишунар алудунин кьвед лагьай этапдал элячIнава. Идан гьакъиндай республикадин мулкунал коронавирусдин цIийи тIугъвал гъунин ва чукIурунин вилик пад кьадай региондин Оперативный штабдин нубатдин заседанидал 14-июлдиз хабар гана.

“Дагъустан сергьятламишунар алудунин кьвед лагьай этапдал тамамдаказ элячIнава ва пуд лагьай этапдиз гьазур жезва. Им кафейривай ва ачух балхунар галай ресторанривай ва 800 квадратный метрдал къведалди майдан авай недай-хъвадай суьрсетдинбур тушир товарар кура-кура маса гузвай туьк­венривай чирвилер гудай бязи тешкилатривай, мискIинривай ва ибадатханайривай, кIвалах башламиш хъувуртIа жеда лагьай чIал я”, — лугьузва малуматда.

Дагъустандин Кьил Владимир Васильева  къейд авурвал, вири и объектривай, “анжах Роспотребнадзорди тестикьарнавай вири нормаяр кьетIи гьалда тамамариз хьайи­тIа, кIвалахиз жеда. Сайтда хабар гузвайвал, яваш-явашдиз сергьятлувилер алуддай мумкинвал “эпидемиологиядин гьалар хейлин хъсан хьунихъ галаз алакъалу я”.

Владимир Васильева заседание кьиле физвай вахтунда аялрин бахчаяр ахтармишунин месэладизни фикир гун лазим тирди лагьана.

Идалайни гъейри, ада “къецепатан уьлквейрай хквезвай вири ксар COVID -19 квани, квачни ахтармишун” тапшурмишна.

Вичин нубатдай яз Дагъустандин Гьукуматдин Председатель Артем Здунова алишверишдин центраяр кIвалах хъийиз ахъаюнин месэладиз артух фикир гун лазим тирди ла­гьана. “Сад ва кьвед лагьай этапра алишверишдин залрин майдан 400-дал къведалди майдан авай ва 400-лай 800-квадратный метрдал кьван майдан авай туьквенри кIвала­хиз башламишнавайди лагьана амма чIе­хи майдан авай алишверишдин центрайри гье­ле кIвалах башламиш  хъувун тавунвайди къейд­на­.

Спортивный залрин, алишверишдин центрайрин гьакъиндай месэладиз фикир гун лазим тирди лагьана. И карда ада бизнесдин иесийрин фикир гьихьтинди ятIа чирун важиблу тирди къейдна”, — хабар гузва сайтди.

Сергьятламишунин сад лагьай этап Да­гъус­тандин властри 15-июндиз алудиз башламишнай. А чIавуз къуллугъардай хилерин карханайри, не­дай­-хъвадай суьрсетдинбур тушир туьквенри кIва­лахиз башламишнай. Сейрдиз экъечIдай ва ачух гьавадал спортдал машгъул жедай ихтияр ганай.

«Лезги газет»