Сулейман-Стальский райондиз райбольницадин территорияда дизелдин генератор эцигун патал Ставропольедай “Компрессор — центр” тешкилатдин пешекарар атана. Ам эцигунин ва кIватIунин кIвалахар са йикъан къене куьтягьда.
Меценат Салман Бабаеван мергьяматлувилин такьатрин гьисабдай маса къачунвай (FE) ДГУ 100|400КА дизелдин генератордин къиметди, хкунин ва кIватIунин харжиярни кваз, 705 агъзур манат тешкилзава. И такьатрикай 590 агъзур манат — генератордин, 100 агъзур манат — кIватIунин кIвалахрин, 15 агъзур манатни хкунин къимет я. Аварияр хьана, электроэнергия хкатай дуьшуьшра 100 кВт-дин къуват авай дизелдин электростанцияди райондин ЦРБ ара атIунар авачиз электроэнергиядалди таъминарда.
РикIел хкин хьи, коронавирусдин тIугъвал чукIунихъ галаз алакъалу яз санитариядинни эпидемиологиядин гьалар хъсанардай серенжемар кьиле тухунин макьсаддалди Агъа СтIал-Къазмайрилай тир Салман Мегьамедрасулович Бабаева Сулейман-Стальский район вилик финин фондуниз 5 миллион манатдин кьадарда аваз мергьяматлувилин такьатар гана. Муниципальный райондин кьил Нариман Абдулмуталибован къарардалди, райбольницадин кьилин духтурдин везифаяр тамамарзавайдан ва общественностдин векилрин иштираквал аваз, финансрин и такьатар ишлемишдай рекьер тайинардай комиссия тешкилна.
Чара авунвай такьатар харж авунин сергьятра аваз, коронавирусдик начагъ хьайибур сагъар хъувунин карда иштиракай райондин 170 медработникдин банкарин счетриз 2 миллионни 580 агъзур манат руьгьламишдай пулар яна.
Ихьтин такьатар тади куьмекдин, инфекцийрин госпиталдин, терапевтический отделенидин поликлиникадин ва участковый звенодин духтурри, медсестрайри, санитаркайри ва гъвечIи медкъуллугъчийрини къачуна.
«Лезги газет»
