Дагъустанда 15-июндилай коронавирусдихъ галаз алакъалу яз тайинарнавай сергьятар алудиз гатIунда. Идакай Оперштабдин саласа юкъуз Махачкъалада кьиле фейи нубатдин заседанидал РД-дин Кьил Владимир Васильева хабар гана.
Республикадин Роспотребнадзордин Управленидин кьил Николай Павлова къейд авурвал, санлай къачурла, Дагъларин уьлкведа гьалар хъсан патахъ дегиш жезва. Амма тIугъвалдин лепе тамамдиз зайиф хьанвайди тестикьарун гьеле фад я. И кардихъ галаз алакъалу яз, сергьятар алудунин месэладив мукъаятвилелди эгечIна кIанда.
Николай Павлован тереф РД-дин здравоохраненидин министр Жамалудин Гьажиибрагьимовани хвена. Адан фикирдалди, гьалар хъсан патахъ дегиш жезватIани, сергьятар алудунин жигьетдай кьетIи серенжемар кьабулун гьеле фад я.
Владимир Васильева хабар гайивал, 5 районди ва муниципалитетдин са участокди сергьятар алудун фад яз гьисабзава. Абурун арада Мегьарамдхуьруьн, Кьурагь, Гергебил, Къумторкъала, ЧIарода ва Бежта ава. Гьа са вахтунда республикадин 41 шегьердини районди сергьятар алудун патал серенжемар кьабулна кIанзавайдан игьтияж авайди малумарнава. Гьелбетда, Роспотребнадзордин меслятар фикирда кьуналди.
“Вири теклифри еке жавабдарвал истемишзава ва шегьеррин, районрин кьилери чкайрал гьалар къайдадикай хкат тавун патал еке кIвалах кьиле тухузва. И жигьетдай заз квез виридаз сагърай лугьуз кIанзава. Республикада хъсан патахъай кьиле физвай дегишвилер чи виридан умуми агалкьун я”, — лагьана Владимир Васильева.
Чпин нубатда шегьеррин ва районрин кьилери 15-июндилай коронавирусдихъ галаз алакъалу яз тайинарнавай сергьятар алудунин месэлайриз килигун тIалабна.
Дагъустандин Кьили и важиблу карда Роспотребнадзордин, министерствойрин теклифар, меслятар фикирда кьунихъ метлеб авайди къейдна. Ада алава хъувурвал, сергьятар алудиз тахминан 15-июндилай гатIунда.
Чи мухбир
