Республикадин кьил В. Васильева теклифнавай «Къацу километрияр» серенжем давамаруналди ва идахъ галаз алакъалу яз райондин кьил Ф.Агьмедова субботник тухунин гьакъиндай акъудай къарар тамамаруналди, Мегьарамдхуьруьн райондин мулкара къацу къелемар цунин кIвалахар давамарзава.

«Лезги газетдиз» райондин администрациядин пресс-къуллугъди хабар гузвайвал, Советский хуьруьн администрациядин ва тарихни край чирдай музейдин къуллугъчийри мулкар къацу авунин субботникда иштиракна. Важиблу серенжемда абуру жуьреба-жуьре къелемар цана.

Къейднавай серенжемдин макьсад жемиятдин фикир хайи ерияр абадунин, тIебиатдив къадирлудаказ эгечIунин месэлайрал желбун я.

ТIвар кьунвай серенжем райондин Хъартас-Къазмайрин хуьрени тешкилна. Иштиракайбуру хуьруьхъ физвай рекьин къерех тирвал 100 къелем цана.

РикIел хкин, ихьтин жуьредин кIвалахар идалай вилик райондин бязи маса хуьрерани кьилиз акъудна.

«Лезги газет»