Райондин кьил Нариман Абдулмуталибован тапшуругъдалди Сулейман-Стальский райондин хуьрерин администрацийрин кьилер дигидай цин месэлаяр гьялунив эгечIнава. Идакай «Лезги газетдиз» райадминистрациядин пресс-къуллугъди хабар гузва.
Гатфарин вахт алукьайла, хуьрерин агьалияр дигидай целди таъминарунин месэла эвелимжибурукай сад я. И йикъара Герейханов хуьре, никIерни салар дигидай гатфаринни гатун сезондиз гьазурвал акунин сергьятра аваз, хуьруьн майишатдин къенепатан «Данакъар» дигидай къанал михьунин, ремонтунин кIвалахар тешкилнава.
Къейдна кIанда хьи, тIвар кьунвай къаналди 150 майишат дигидай целди таъминарзава. Ихтилат физвай участокда ремонтдин кIвалахар эхиримжи вахтара кьиле тухванвачир.
«Лезги газет»
