Дагъустандин лайихлу артист, международный “Россиядин къизилдин сес” конкурсдин Гран-придин сагьиб, Сад лагьай каналдин “Голос” шоудин иштиракчи Селим Алагьяров “Дагъустан” РИА-диз мугьман хьана.

Журналистриз ада вич “Голос­” про­ектдиз акъатай тегьердикай суьгьбетна.

— Иштиракчияр хкязавай вахт тир. Анкета ацIурна. Гуьгъуьнай жаваб хтана ва заз Останкинодиз кастингдал эверна. Аниз Россиядин вири пипIерай  агъзурдалай гзаф ксар атанвай. Иштиракчияр жез кIанзавайбурун 15 агъзур анкета авай. Сифте кастинг, кьиле Юрий Аксюта аваз, 12 касдикай ибарат комиссиядин вилик хьана, — лагьана Селима.

Алай вахтунда Селима Любовь Ка­зарновскаядин гъилик тежриба къачузва ва ам международный чIехи конкурс­диз гьазур жезва.

— Проектдин сергьятра аваз сегьнедиз экъечIдайла, рикIик пара къалабулух акатнавай. ГьикI хьи, ваз миллионралди инсанар килигзава. Чизва, эгер жюридин членрикай садни вахъ элкъуьн­ тавуртIа, герек авачир рахунар башламишда: “вучиз аниз фена”, “беябурна”, “аниз те­фе­найтIа, хъсан тир”… Бязи инсанриз чизвач, 15 агъзур касдикай хкягъай 150 иштиракчидин арада аваз а сегьнедиз акъа­тун — имни са гъалибвал я.

С.Алагьярова гила “нокаутра” иштиракда. И проектдин сегьнедал чаз Селим нубатдин сеферда декабрдин вацра аквада.

— Эгер гъалибвал къазанмишиз ала­кьайтIа, финалдин кьудай са паюниз ­акъатда. Ана СМС-сесер гунар, яни халкьдин патай куьмек герек жеда, — алава хъувуна Селима.

«Лезги Газет»