Чи ватанэгьлияр — гьар сана
Дамахдивди къейд ийиз жедай кар ам я хьи, чахъ, лезгийрихъ, саки гьар са шегьерда, уьлкведа пешекарвилин рекьяй агалкьунралди вини дережаяр муьтIуьгъарзавай, хкягъай пеше ва вилик эцигай макьсад уьмуьрдин метлебдиз элкъуьрзавай, къастунал кIевивалзавай жегьил векилар ава.
Краснодарда яшамиш жезвай ва кIвалахзавай, вичин ери-бине Кьасумхуьрелай тир Мадина Абдулаевна Ражабовани гьахьтинбурукай сад я. Ам 1991-йисан 28-февралдиз Краснодар шегьерда дидедиз хьана. Аял вахтар ва гатун тIатIилар багърийрихъ галаз Кьасумхуьрел акъудзавай. Ам чIехи бубадинни бадедин рикI алай хтулдиз элкъвенвай.
Мадинади Краснодар шегьердин 45-нумрадин мектеб лап хъсан къиметралди куьтягьна. Адахъ мектебда кIелай йисара къазанмишнавай агалкьунриз килигна ганвай грамотаяр, дипломар гзаф кьадарда ава. Вири терефрикай чирвилер къачунал рикI алай руш тирвиляй ам мектебдин “Вуч? Мус? Гьина?” къугъунин командадин капитан тир. 2008-йисуз Кубандин гьукуматдин аграрный университетдин идарайрин экономикадин ва управленидин факультетдик экечIна. Мектебда хьиз, университетдани ада вич викIегь ва хъсан чирвилер авай руш тирди субутна. Ам гьар са мярекатдин вилик-кьилик квай студентка, курсунин староста яз вирибуруз сейли хьанвай. Зегьметдин рехъни ада, гьа са вахтунда вузда кIелзамаз, анин информациядин технологийрин кафедрадин лаборант яз кIвалахунилай башламишна. 2013-йисуз Мадина Ражабовади университет яру дипломдалди куьтягьна.
2013-2019-йисара ада Краснодардин крайдин администрациядин къвалав гвай ветеринариядин департаментда гьукуматдин гражданский къуллугъдал кIвалахна. Ина сифтедай кьилин пешекар-эксперт яз кIвалахдив эгечIай жегьилдикай са тIимил вахтунилай анин финансированидин, бухгалтериядин, гьахъ-гьисабдин ва гуьзчивилин отделдин чIехи консультант хьана. Гьукуматдин закупкайрин, ведомстводин гуьзчивилик квай ветеринариядин 55 идарадин кIвалахар ахтармишунин, гуьзчивал тухунин жавабдар кIвалахрал машгъул хьана, жуьреба-жуьре конференцийра иштиракна…
Гъавурдик квай, акьул ва чирвилер авай жегьил пешекардиз хас тирвал, ам къуллугъдин рекьяй вини дережайриз хкаж жезва.
2018-йисуз ада РФ-дин Гьукуматдин патав гвай финансрин университетда пешекарвилин дережа хкажна. Краснодардин крайдин ветеринариядин департаментдин кьиле авайбуру адан гьакъисагъ ва бегьерлу зегьмет са шумудра гьуьрметдин грамотайралди къейдна. 2019-йисалай эгечIна М.Ражабовади региондин энергетикадин комиссиядин департаментда Краснодардин крайдин бухгалтерский учетдин ва гьахъ-гьисабдин отделдин кьилин консультант яз кIвалахзава. И йисуз ада коррупциядиз аксивалунин курсарани чирвилер къачуна. Ам къуллугъчийрин арада нуфузлу ва сейли пешекар я.
Гележегда Мадинадиз аспирантурадик экечIдай, илимдал машгъул жедай фикир ава. Агалкьунар кьакьанбур хьурай къастунал кIеви жегьилдихъ!
Куругъли Ферзалиев
