Алай йисан 25-августдиз чавай пара регьимлу, зегьметчи инсан, “Лезги газетдин” умудлу амадаг, милли медениятдал, эдебиятдал рикI алай гьевескар Ибрагьимов Верди Ибрагьимович къакъатна.
В.Ибрагьимов 1934-йисуз Кьурагь райондин Хпежрин хуьре дидедиз хьана. Адан аял вахтар пара азиятра фена. Дуьньядиз атана кьве йисни тахьанмаз ам архайрикай, цIуд йисавни агакь тавунмаз, дахдикай магьрум хьана. Дяведин йисара адаз кашни, мекьни акуна. 1949-йисуз суьргуьндиз акъуднавай чIехи буба (дидедин патай) Таривердиди вичин руш Халисат кьуд хвани галаз Соколук райондин “Джанг-Джер” совхоздик акатзавай 9-хутордиз хутахна. Гьа ина Вердиди школани куьтягьна.
1959-йисуз армиядин жергейриз тухвай В.Ибрагьимова пуд йисуз Воронежда эцигунардайбурун частара къуллугъна ва хейлин важиблу объектар эцигунин кIвалахра иштиракна.
Армиядай Къиргъизистандиз хъфей гада са тIимил вахтундилай Дагъустандиз хтана. Махачкъалада ам 4-нумрадин СМУ-да кIвалахал акъвазна. Гьа са вахтунда рикI милли манийрал алай гада меркездин ракьун рекьерин работникрин клубдин художественный самодеятельностдик экечIна.
Уьмуьрдин юлдаш хкягъай чка Дагъустандин Огни поселок хьайивиляй, Ибрагьимов гьаниз хъфена, СМУ-да, 1968-йисалай шуьшедин заводда кIвалахна, техникумдани кIелна.
Вири вахтара ада республикадин культурадин уьмуьрда активвилелди иштиракна.
Вучда, уьмуьр я, мукьва-кьилийри, дустари, къуншийри вахъ дерт чIугвазва, Верди Ибрагьимович. Женнетдин нур аваз хьурай ви сура…
Чна рагьметлудан хизандиз, адан бажанах Нариман Ибрагьимоваз ва вири багърийриз башсагълугъвал гузва.
“Лезги газетдин” редакциядин коллектив
