20-ноябрдиз чна — РД-дин искусствойрин­ лайихлу деятель Мамедали Агъабалаева, аялрин кьуьлердай «Кавха» ансамблдин кьил Сефербег Сефербегова, видео-оператор Алибала Букарова ва и цIарарин авторди махсус серенжемдай отпускдиз хтанвай Дербент райондин Нуьгди хуьряй тир чи дуст, манидар ва тамада Кемран Алимирзоевал кьил чIугуна.

Жузун-качузун авурдалай къулухъ ада чаз махсус серенжемда авай гьаларикай суьгьбетар авуна.

Кемран 1982-йисуз КIимихуьряй тир ­Пакизатанни Анверан хизанда дидедиз хьана. Буба ам гъвечIизамаз рагьметдиз фена. Авай са гада кIвачел акьалдарунин везифа дидедин хиве гьатна. Юкьван школада кIелзамаз, Кемрана, Белиж поселокдин аялринни жаванрин яратмишунрин кIвализ физ, хъсан музыкант М. Агъабалаевавай чирвилер къачунай. Нуьгдида яшамиш жезвай агьалияр зегьмет кIани саларбанар тирди виридаз малум я. Зегьмет Кемранани гъвечIизамаз гьиссна. Ам азад вахтунда гьамиша дидедихъ галаз сала кIвалахиз жедай. Школада кIелзавай, аялрин яратмишунрин кIвале музыкадал машгъул жезвай гада дидедиз хъсан куьмекчини хьана. Юкьван школа акьалтIарайла, диде кьилди ­туна, адавай кIелиз маса шегьерриз физ хьанач.

2000-йисуз адаз Россиядин армиядин жергейриз эверна. Екатеринбургда ПВО-дин частуна, старший сержант яз, взводдин командирдин заместителвиле къуллугъна хтай аскерди хуьре гьар жуьре кIвалахар авуна. Эвленмиш хьана. Яваш-яваш манияр лугьуз гатIунна. «Кавха» ансамблдин кьил С. Сефербегова ам манидар яз вичин дестедиз кьабулна. Маниярни лугьуз, тамадавални ийиз, ада халкьдин арада гьуьрмет къазанмишна. Ахпа Къизляр ва Махачкъала шегьеррин ресторанра манияр лугьун давамарна.

Украинада махсус серенжем гатIу­най­далай кьулухъ гьана ава, Россиядин регионрай атанвайбурухъ  галаз санал ам Запорожье галай патахъ рекье туна…

— Нубатдин сеферда миллетчийрин диверсиядинни разведкадин десте чун галай патахъ къвезвайдакай чаз чи разведкади хабар гана, — рикIел хкизва Кемрана. — Командованиди чи вилик миллетчийрин дес­те терг авунин везифа эцигна. Йифиз аквадай приборарни гваз чун абур къвезвай патахъ фена, вилив хуьз акъвазна. Абур лап мукьва хьайила, чна гуьлле гана, чIехи пай тергна, сад-кьвед кат хъувуна. Вилик эцигнавай и ва маса тапшуругъар агалкьунралди кьилиз акъудунай чи отделенидин аскерриз, гьа жигьетдай яз зазни РФ-дин Президентдин Указдалди 2023-йисан февралдиз «Пак Георгийдин 4-дережадин хаш» орден гана.

2024-йисан июлдиз Верхняя Криница хуьре душманди абур акъвазнавай чкадиз гуьлле гана. Чи дронри душмандал хьиткьиндай шейэр вегьезвайтIани, абурун са снаряд Кемран авай блиндаждин къвалав аватна. Нетижада, пад хьайила, алатай кIус галукьна, адан гъилел залан хер хьана.

Кемран сагъламвал мягькемар хъийиз Севастополдин, Краснодардин ва Владикавказдин госпиталра саки кьве вацра къаткана. Госпиталдай ахъаяйла, ам вичин час­туниз хъфена.

Женгера къалурай викIегь­вилерай ва жуьрэтлувиляй адаз Суворован медаль ­гана.

Майдин вацра, Ватандин ЧIехи дяведа Гъалибвал къазанмишна 79 йис тамам хьунихъ галаз алакъалу яз, гвардиядин старший сержант К. Алимирзоеваз «Аскервилин буржи лап хъсандиз тамамарунай» грамота гана.

К. Алимирзоев дежурствода авай ок­тябр­дин са юкъуз миллетчийри гьар садай цIуд кило къвезвай муьжуьд снаряд алай еке «Баба яга» дрон ракъурна. Яргъай къвезвай адан ван хьанмазди, Кемрана Калашникован пулемётдай адаз гуьлле гана. Нетижада ам яна гадарна. Галай юлдашриз са зарарни хьанач. Командованиди               К. Алимирзоеваз отпускдин йикъарал вад югъ алава хъувуна.

Кемранан дидедиз рахкурай разивилин чарче ихьтин гафар ава: «Гьуьрметлу Пакизат Гьажимурадовна! Куь хва Кемран Алимирзоева вичин зегьметдалди, вези­файрив жавабдарвилелди эгечIуналди ­ко­мандирринни юлдашрин арада гьуьр­мет къазанмишнава. Ада вичин къуллугъдин буржи намуслувилелди тамамарзава… Куь хци Ватан хуьзвайбурун жергеда лайихлу чка кьунал квевай дамах ийиз жеда. Командованиди квез, хциз камаллувилелди дуьз тербия гунай, сагърай лугьузва».

Ватандин итижар хуьдайла, чандилайни гъил къачуна, къалурай кьетIен лайих­лувилерай ва жуьрэтлувиляй Дербент райондин кьил Мавсум Рагьимова Кемран Алимирзоевав Дагъустан Республикадин «Халкьдин Игит» лагьай махсус гъед шад гьалара вахкана.

Кемранан хизанда кьве хва ава. Салигь, Россиядин Армиядин жергейра къуллугъна, кIвализ хтанва. Вугара Дербентдин экономикадинни праводин колледждин кьвед лагьай курсуна кIелзава.

Къагьриман Ибрагьимов