Алай йисан августдин вацра Мегьамед Алиханова РФ-дин оборонадин министерстводихъ галаз, гуьгьуьллувилелди къуллугъда лагьана, икьрар кутlунна. Ада Дагъустанда тешкилнавай «Каспий» батальонда взводдин командирдин заместитель яз къуллугъзава. Сентябрдин эхирра ДНР-дин Солидар шегьердин къваларив кьиле фейи женгина адан кlвачерал хирер хьана, ам госпиталдиз аватна.
Сифтегьан сагъламвилин серенжемар кьабулайдалай гуьгъуьниз ам госпиталдай аххъайна. Алай вахтунда, сагъламвал мягькемариз, М. Алиханов госпиталда ава. Аниз, адал кьил чlугваз, РД-дин Кьил Сергей Меликов ва РД-дин Халкьдин Собранидин Председатель Заур Аскендеров фена.
Ихтилатар авур вахтунда Мегьамед Алиханова чкадин агьалийри чпиз куьмек гунай Россиядин аскеррилай разивал къалурзавайдакай суьгьбетна.
Дагъустандин Кьили махсус серенжемда хъсандиз къуллугъ авунай, аскервилин буржи гьакъисагъдаказ тамамарунай ва гражданвилин гьисс авайвиляй М. Алихановаз сагърай лагьана ва духтурри адан сагъламвал фад мягькемар хъийидайдахъ инанмишарна. Гьакlни ада «ви багърияр гьамиша чи фикирдик ква, герек месэлаяр хьайитlа, жедай вири куьмекар гудайди я» лагьана.
Ахпа адав РД-дин Кьили рикlел аламукьдай, тlвар кхьенвай сят, З. Аскендерова Разивилин чар вахкана.
Мегьамед Алиханов 1978-йисуз Дербент шегьерда куьнуьчи Магьмудан хизанда дидедиз хьана. Бинеяр Ахцегьай тир адан буба динэгьли тир. Мегьамед 2006-йисуз Махачкъалада авай гуманитарный ва педагогвилин колледждин араб чlалан отделенидик экечlна. Ахпа карчивилин гьар жуьре рекьерай кlвалахар авуна. Кlвалахдивай къерех тахьана, 2010-йисуз ада Маммадибир ар-Речидин тlварцlихъ галай международный алакъайрин ва теологиядин институтдин экономикадин факультетда кlелун давамарна. 2015-2019-йисара Дагъустандин гуманитарный институтдин экономикадин факультетда лап хъсан къиметар аваз кlелна, экономикадин хиляй пешекарвилин чирвилер генани хкажна.
М. Алиханов 2019-йисуз РД-дин милли сиясатдин ва динрин крарин рекьяй министерствода РФ-дин ва къунши гьукуматра авай дагъустанвийрин арада сад-садахъ галаз алакъаяр хуьнин рекьяй Советдин председателвиле тайинарна.
Ина кlвалахай девирда ада СНГ-дин гьукуматра ва Россиядин регионра авай ватанэгьлийрихъ галаз алакъаяр кутlунна, РД-дин культурадин, спортдин министерствойрин ва муфтиятдин векилар желбна, чкадин властдин векилрихъ, къуллугъзавай дагъустанви аскеррихъ, ватанэгьлияр тир студентрихъ, кар атlанвай дагъустанвийрихъ галаз гуьруьшар тешкилна, сад-садаз мукьва ийидай зурба кlвалах тухвана.
Кlвалахдивай къерех тахьана, М. Алиханова РФ-дин Президентдин къвалав гвай государстводин къуллугъдин ва Россиядин халкьдин майишатдин академиядин государстводинни муниципальный управленидин факультет акьалтlарна.
2021-йисуз ам Ахцегь райондай «Сад тир Россия» партиядин векил яз РД-дин Халкьдин Собранидин депутатвиле хкяна. Сифте ада РД-дин Халкьдин Собранида милли сиясатдин, жемиятдинни диндин тешкилатрин месэлайрай ва парламентрин арада алакъайрай» комитетдин член яз, ахпа налогрин комитетдин председателдин заместитель яз кlвалахна.
Депутатвилин везифаяр тамамарзавай вахтунда М. Алиханова агьвал авачир ва махсус серенжемдин иштиракчийрин хизанриз куьмекар гун тешкилна. «Сад тир Россия» партиядин патай, мергьяматлувилин «Инсан» фондунихъ галаз санал, ада махсус серенжемда иштиракзавайбурун саки 100 хизандив гъуьрни шекер агакьарна. Гуьгьуьллудаказ ва мобилизациядин сергьятра аваз СВО-диз фенвайбурун хизанриз ада куьмекар гудай серенжемар ва маса мярекатар тешкилна…
Алай йисан апрелдин вацра ам, вичин хушуналди депутатвилин везифаяр акъвазарна, Махачкъала шегьердин администрацияда мэриядин аппаратдин руководителдин заместителвиле кlвалахал акъвазна.
М. Алиханов международный дережадин агалкьунар авай топ-менеджерни я. Адахъ Стокгольмдин экономикадин школадин ва Кембридждин университетдин дережаяр, гьакlни Россиядинни къецепатан Statoil, АО «ВымпелКом», «Ренессанс Групп», СК «Цюрих», группа «Ренова» компанийрихъ галаз алакъаяр ава. Хизанда кьве велед тербияламишзава.
Къагьриман Ибрагьимов
