И йикъара СтIал Сулейманан райондин Курхуьруьн 1-нумрадин юкьван школада «Йисан муаллим» конкурсдин райондин паюнин финал кьиле  фена. Идакай чаз райадминист­рациядин пресс-къуллугъди хабар гана. Конкурсдин нетижаяр кьуниз талукьарнавай мярекатда райондин кьил Саид Темирханова­, образованидин управленидин начальник Гьуь­сейн Шихбабаева ва методцентрадин пешекарри иштиракна.

Райондин регьберди къейд авурвал, ихьтин конкурсра иштиракзавай муаллимри неинки чпин тежриба амайбуруз раижзава, гьакI абур кIвалахдин рекьяй чпин юлдашар ва ученикар патални чешне я. Конкурсди муаллимри чпин кIвалах датIана хъсанарунизни таъсирзава. ГьикI хьи, гьикьван чи муаллимрихъ хъсан гьазурлухвал аватIа ва абуру чпин тарсар менфятлудаказни итижлудаказ тухузватIа, гьакьван и кардилай чи аялрин гьазурлухвилин дережани аслу я. Кьилинди ам я хьи, конкурсди муаллимрин арадай виридалайни хъсан тежриба авайбур майдандиз акъуддай, чирвилер гунин цIийи методикаяр ва къайдаяр уьмуьрдиз кечирмишдай мумкинвал гузва. Идалайни гъейри, ихьтин серенжемри муаллимвилин пешедикай жемиятдин фикир арадал гъуниз таъсирзава, акьалтзавай несил тербияламишунин ва чирвилер гунин карда муаллимдин зегьметдин важиблувал къалурзава.

— Гьуьрметлу муаллимар! Агалкьунар куьне зегьмет чIугвазвай коллективрин менфятлувал къалурзавай делил я. Муаллимдин пешедин кесерлувал хкажун, мягькемарун чна сифте нубатда­ фикир гузвай месэлайрик ква. Дугъриданни, муаллимрин хиве акьалтзавай несилдиз лайихлу тербия гунин зурба жавабдарвал ава. ЧIугвазвай гьакъисагъ зегьметдай ва пешедиз вафалувиляй куьн сагърай. Къуй квехъ чандин мягькем сагъвал, кIвалахда мадни еке агалкьунар, куь хизанрани хушбахтлувал хьурай! — алхишна С. Темирханова.

Муаллимриз чими келимаяр райондин обра­зованидин управленидин начальник Гьуьсейн Ших­бабаева ва методотделдин пешекаррини лагьана.

Гьар йисуз кьиле тухузвай (вичин  макьсад хъсандиз кIвалахзавай муаллимар майдандиз акъудун ва абур руьгьламишун, образованидин хи­лен хъсан теклифар ва тежриба машгьурун, муаллимвилин пешедин кесерлувал хкажун тир) и конкурсдин райондин паюна иштиракай муаллимри чпин тарсар ва кIвалахдилай къецяй тир мярекатар къалурна, методикадин семинарар ва мастер-классар кьиле тухвана, чирвилер гунин ва тербиядин рекьяй кар алай месэлаяр веревирдна.

ИкI, конкурсдин нетижайралди 1-чкадиз Зизик­рин юкьван школадин биологиядин муаллим, ДГУ-дин биологиядин факультет ва алава образованидин институт яру дипломралди акьалтIарнавай Айна Имамова (шикилда) лайихлу хьана. ЦIийи­­хуьруьн СОШ-дин ингилис чIалан муаллим Сегьерханум Цмихановади ва Эминхуьруьн СОШ-дин обществознанидин муаллим Лилия Къагьримановади 2-чка пайна. ЦIийи Макьарин СОШ-дин ИЗО-дин муаллим Жамиля Мегьамедова ва КIварчагърин СОШ-дин географиядин муаллим Рагина Жамалдинова 3-чкайриз лайихлу хьана.

КIвенкIвечи чкаяр кьур муаллимриз грамотаяр ва къиметлу пишкешар гана. Айна Имамовади республикадин конкурсдиз гьазурвал аквазва.

Рагнеда  Рамалданова