Математикадин тарсар гузвай муаллим Оружева Маржанат Идаятовнадикай макъала кхьин патал Кьасумхуьруьн 1-нумрадин школадиз фейила, “Закай газетда вуч лагьана кхьида, буржи кьилиз акъудзава, кIвалахзава ман” — лагьана ада.
Эхь, кIвалах вирида ийизва, амма гьикI?
Чаз малум хьайивал, Маржанат муаллимдин дах Идаят Абдуллаева яргъал йисара райондин школайра муаллимвиле, са шумуд йисуз Рухунрин муьжуьд йисан школада директорвиле кIвалахна. Кьилинди, ада вичин веледар муаллимвилин пешедал ашукьарна, идан нетижа яз, ирид веледди бубадин рехъ давамарзава. Абурукай сад Маржанат я.
Дагъустандин педагогвилин институт акьалтIарайдалай инихъ ингье 44 йис я ада Кьасумхуьруьн 1-нумрадин юкьван школада кIвалахиз, акьалтзавай несилдиз математикадин тарсар гуз. И девирда муаллимди тарсар гайи гзафбурукай чIехи дережайрин руководителар, алимар, жуьреба-жуьре пешейрин сагьибар хьанва. Тек са математикадин муаллимар хьанвайбурун кьадар 30-далай виниз я.
Маржанат муаллимди тарсар гузвай аялри математикадай районда ва республикада тухузвай школьникрин олимпиадайра кIвенкIвечи чкаяр кьун — имни адетдиз элкъвенвай кар я.
“Вирида хьиз, зани кIвалахзава”, — Маржанат Оружевади чи арада суьгьбет кьиле фидай вахтунда и гафар са шумудра тикрарна. Тежрибалу муаллимди гьикI кIвалахзаватIа, гьа кар адаз ганвай тIварарини грамотайри ачухарзава: Маржанат Оружева “РФ-дин халкьдин образованидин отличник”, “РФ-дин образованидин гьуьрметлу работник” тIварарин, РФ-дин Президентдин грантдин, РД-дин образованидин ва илимдин министерстводин, райондин образованидин управленидин гьуьрметдин грамотайрин, дипломрин, къиметлу пишкешрин сагьиб я.
Маржанат Идаятовнадин уьмуьрдин юлдаш Азим Мегьамеднабиевични районда биологиядин лап хъсан муаллимрикай сад тир. Ада са шумуд йисуз райондин образованидин управленида инспекторвиле, 15 йисалай гзаф вахтунда Герейханован 2-нумрадин ва ЦIийи поселокдин юкьван школайра директорвиле кIвалахна. Азим Оружевни образованидин отличник ва образованидин гьуьрметлу работник тир.
Дуьз лугьузва бубайрин мисалда: дишегьли сифте нубатда диде хьун лазим я. Маржанат муаллимди вич бахтлу диде язни гьисабзава. Ада Азим Мегьамеднабиевичахъ галаз санал 5 велед уьмуьрдин шегьредал акъудна. Алай вахтунда абуру чи уьлкведин жуьреба-жуьре шегьерра духтурар, юристар, карчияр яз зегьмет чIугвазва.
Маржанат муаллимдин са веледдин — Эмиран хизандал кьилди акъвазин. Эмир Азимовича Дагъустандин госуниверситетдин экономикадин факультет, гуьгъуьнлай Санкт-Петербургдин университет акьалтIарна, уьлкведин Кеферпатан меркезда вичин пешедай кIва-лахзава.
Адан уьмуьрдин юлдаш Ханум Зурабовнади, Санкт-Петербургдин педагогический университет акьалтIарна, шегьердин 617-нумрадин юкьван школада ингилис чIалан муаллимвиле ва школадин завучвиле кIвалахзава.
Эмир ва Ханум Оружеврин хизандал чун кьилди акъвазунин “сир” ам я хьи, абурун велед Азима гьеле школада амаз Оружевар, лезги халкь ва Дагъустан дуьньядиз машгьурзава. Санкт-Петербургдин 617-нумрадин юкьван школада кIелзавай Азим цIи Нью-Йоркда авай ООН-дин штаб-квартирада стажировкада хьана. Адаз ингилис чIални лап хъсандаказ чида.
Азим Оружева Нью-Йоркдай хтайла суьгьбет авурвал, стажировкадиз 103 уьлкведай тир 500 кас, Россиядай 70 жегьил фенвай, вири студентар, анжах Азим — школьник.
— “Модель ООН в Нью-Йорке 2018” программадай тухвай и мярекатда жегьилри дипломатвилин, лидервилин ва ораторвилин рекьерай чпин алакьунар къалурна. Чипдай заз Австрия акъатна. За Австриядин миграционный политикадикай авур рахунар пешекарриз бегенмиш хьана, абуру зи кIвалахдиз хъсан къиметни гана, — лагьана чаз Азима вичин баде Маржанат Идаятовнадал кьил чIугваз Кьасумхуьрел хтайла.
Эхь, Оружевар баркалладин таж алайбур я. Маржанат Идаятовнадикай, адан хизандикай, хтулрикай макъала кхьидайла, фикирдиз рагьметлу шаир Рамазан Каитован шиирдин цIарар атана: “Чил сад я, гьар са майвадихъ са дад ава, Инсанар — сад, гьардахъ вичин ад ава”.
Гьар са инсандихъ, вичин ад хьиз, вичин рехъни ава. Оружеври кьунвай, тухузвай рехъни баркаллуди я — савадлувилин рехъ!
Асият Мирзалиева,
Хазран Кьасумов
