Лугьуда хьи, гьар са аялдихъ бажарагъ ава. Амма бажарагъдин цIелхем куькIвей береда а цIелхем туьхуьрунин ваъ, къати авунин серенжемар кьабулунихъни аялдин гележег патал зурба метлеб ава.
Лезги аялрин арадани бажарагълубур авачиз туш. Ингье заз КIахцугърин хуьре яшамиш жезвай гъвечIи руш Аминадикай, адан бажарагъдикай ихтилатиз кIанзава.
Гьамзатова Амина Эрзимановна 2012-йисан 1-июндиз дидедиз хьана. Ругуд йис тамам хьанвай Аминадихъ артиствилин алакьунар ава. Гьеле мектебдиз камар къачунвачтIани, адавай кхьиз ва кIелиз жезва. Шиирар хъсандиз рикIел аламукьунин зигьинни ава. Адалай инсанар гьейранариз жедайвал кьуьлер ийиз, манияр тамамаризни алакьзава. И мукьвара адан “Диде” тIвар алай манидиз клип туькIуьрнава.
Амина, халисан артисткади хьиз, кьуьзуь бадедин, парталар маса гузвай алверчидин, гитара язавай музыкантдин, ашпаздин ролда къугъвазвай итижлу нумраяр интернетдани ава. Абур килигзавайбуруз хъвер багъишдайбур, устадвилел инсанар гьейранардайбур я. Са видеороликдай аквазвайвал, аялди гележегда вичикай артистка жеда лугьузва.
Аминадиз чи уьлкведин кьилинди тир Сад лагьай телеканалдай къалурзавай “Лучше всех” передачада иштиракун патал теклиф хтанва. Машгьур артист Максим Галкина кьиле тухузвай и передачада жуьреба-жуьре хилерай чпихъ бажарагъ авай аялри иштиракзава. Гьамзатова Аминади вичин артиствилин алакьунар мукьвара вири уьлкведиз къалурда. Югъур хьурай! — лугьузва чна адаз. Къуй зигьин ва алакьунар авай аялдин мурадар кьилиз акъатрай!
Куругъли Ферзалиев
