Кьасумхуьрел лезгийрин СтIал Сулейманан тIварунихъ галай госмуздрамтеатрдин артистар мугьман хьана. Райцентрадал алай И. Гь. Тагьирован тIварунихъ галай культурадин дворецдин сиве-сивди ацIанвай залда райондин администрациядин жавабдар къуллугъчияр, идарайрин регьберар авай.
Театрдин директор Динара Эминовади ва Дагъустандин халкьдин артист, театрдин кьилин режиссер Мирзебег Мирзебегова тамашачияр тебрикна, зулун сезондин репертуардикай суьгьбетна, мумкинвиликай менфят къачуна, райондин кьил Нариман Абдулмуталибоваз 50 йисан ва шаир Майрудин Бабахановаз 60 йисан юбилеяр мубаракна.
Гуьгъуьнлай театрдин артистри Осетиядин драматург Асахмат Айларован пьесадин бинедаллаз режиссер, Дагъустан Республикадин лайихлу артист Алисултан Батырова сегьнеламишнавай “ЧIулав дагъви” тамаша къалурна.
Мирзебег Мирзебегова къейд авурвал, и тамаша Дагъустан Республикадин культурадин министерстводин культурадинни илимдин “Сегьнедин устадри — Дагъустандин агьалийриз” проектдин сергьятра аваз къалурзава.
“ЧIулав дагъви” — им къемеда я. Ана агьвалатар дагъдин хуьре кьиле физва. Дагъви Дашдемир виликдай Занзибарда, Африкада, яшамиш хьана. Тамам 25 йисалай дагълух хуьруьз Дашдемиран чIулав хамунин гада Къарабег хквезва. И кардал вири мягьтел жезва. Къарабег вичин дахдин къуншидал яшамиш жезвай дагъви рушал ашукь жезва. Рушан диде и кардиз акси я. Къарабега гьар жуьре кьуьруькар акъудзава… Эхирни чIулав хамунин гада дагъви рушал эвленмиш жезва. Рушан дидедини Къарабеган бубади чпин рикIер-сирерни сад ийизва.
Са гафуналди, къемедада хизандин алакъаяр, девлетар, адетар, къалурзава.
Тамашада Дагъустандин халкьдин артист Ибрамхалил Рамазановахъ, тежрибалу артист Валерий Сулеймановахъ галаз санал жегьил артистарни къугъвазва. Абуру сегьнеда жанлу къаматар яратмишнава.
Хазран Кьасумов
