2-ноябрдиз Махачкъалада, Дагъустандин гоcударстводин къумукь халкьдин А.Салаватован тIварунихъ галай муздрамтеатрда, А.Тахо-Годидин тIварунихъ галай Дагъустандин педагогикадин илимдинни ахтармишунардай институтдин 80 йис тамам хьуниз талукьарнавай шад мярекат кьиле фена. Ада РД-дин Гьукуматдин Председатель Абдулмуслим Абдулмуслимова, образованидин министр Ягья Бучаева, Халкьдин Собранидин образованидин комитетдин председатель Елена Павлюченкоди, гьакIни республикадин педагогрин, илимдин жемиятдин векилри иштиракна.
Сифте гаф рахуналди, Абдулмуслим Абдулмуслимова институтди Дагъустандин образованидин ва культурадин хиле виликди тухунин кардик кутунвай еке паюникай лагьана. Кьилди къачуртIа, ада институтди аялриз образование ва тербия гунин, республикада илимдинни педагогикадин кIвалах гуьнгуьна аваз хуьнин, Дагъустандин халкьарин чIалар, адетар, культура хуьнин рекье авунвай кIвалахдикай лагьана.
«Уьлкве патал иллаки четин вахтунда РСФСР-дин Совнаркомди Дагъустанда мектебрин илимдинни ахтармишунин институт ачухуниз талукь тарихдин важиблувал авай къарар кьабулнай. Дяве кьиле физвай вахтунда гьукуматди гзаф миллетрикай ибарат тир Дагъустандин халкьдин образованидин гьакъиндай къайгъударвал авуни государстводи уьлкведин халкьарин чIаларин ва медениятрин кьетIенвал хуьнихъ элкъуьрнавай сиясат шаклувилик садрани кутун тавурдакай шагьидвалзава. Виликан Советрин Союзда авай сад тир Школайрин институт алай вахтундани жегьил несилар чпин халкьарин хайи чIаларал, тарихдал, культурадал ва адетрал желбзавай, абурухъ галаз дериндай танишарзавай илимдинни образованидин авай тек са къурулуш я», — лагьана премьер-министрди.
Ягья Бучаева къейд авурвал, институтди республика патал кьетIен важиблувал авай месэлайрикай сад гьялзава.
«Вичин 80 йисан тарихда институтди Дагъустандин образование ва педагогика виликди тухуник, халкьарин милливал хуьник ва республикадиз талукь делилар авай тарсарин (региондин компонент) ерилувал хкажуник еке пай кутунва. Вич арадал гъайи чIавалай къенин йикъалди ам Дагъустандин образованидин хел милли культурадин хиляй виликди финин центр яз ама», — къейдна Я.Бучаева. Министрди гьакIни Дагъустандин Гьукуматдин Председателдиз милли литературайрай, хайи чIаларай тарсар гуз жедай ктабар маса къачун патал такьатар фикирда кьунай чухсагъул малумарна.
Институтдин къуллугъчийриз сувар Елена Павлюченкодини тебрикна. Ада гьар са агалкьунихъ коллективда кIвалахзавай пешекаррин еке зегьмет галайдакай лагьана.
Мярекатдал гьакIни РАН-дин Дагъустандин федеральный ахтармишунардай центрадин директор А.К.Муртазаев, «Просвещение» издательстводин регионда авай векил С.Ф.Зубов, Вирироссиядин диде-бубайрин милли ассоциациядин Дагъустандин отделенидин регьбер Г.Т.Сурхаева рахана.
РД-дин Гьукуматдин Председателди, образованидин ва илимдин министрди, Халкьдин Собранидин векилди институтдин къуллугъчийриз государстводин ва идарайрин шабагьар, пишкешар гана.
Эхирдай рахай А.Тахо-Годидин тIварунихъ галай Дагъустандин педагогикадин илимдинни ахтармишунардай институтдин директор Альбина Аруховади мугьманриз сагърай лагьана ва къейдна: «Институтдин хайи югъ къейд авуналди, чна идахъ галаз сад хьиз республикадин муаллимриз, насигьатчийриз, методистриз – образованидин хел виликди тухунин кардик пай кутазвай вирибуруз дериндай гьуьрмет ийизвайди малумарзава».
Культурадин ва искусстводин векилри иштиракуни, гьакIни дараматдин дегьлизда республикадин халкьдин художественный сеняткарвилерин выставка ачухуни мярекат Дагъустандиз хас жуьре халисан сувариз элкъуьрна.
Жасмина Саидова
